Brigadista na’in-125 tuir formasaun kona-ba preparativu hasoru eleisaun prezidensiál iha CCB, Vila Antiga, segunda (21/02). Imajen Tatoli/Natalino Belo.

BAUCAU, 21 fevereiru 2022 (TATOLI) – Sekretáriadu Tekniku Admistrasaun Eleitorál (STAE) segunda ne’e, kapasita brigadista na’in-125 hanesan parte preparasaun ba eleisaun prezidensiál períodu 2022-2027.

Objetivu hosi kapasitasaun ne’e mak prepara brigadista sira atu hasoru situasaun no ambiente polítika ne’ebé mai tanba kandidatura daudaun ne’e hamutuk na’in-16 nune’e posibilidade sei mosu situasaun oinoin hanesan polítika no sosiál iha sentru votasaun sira.

Diretór STAE Baucau, Lúcio Freitas Salvador. Imajen Tatoli/Natalino Belo.

“STAE mak sei responsabliza prosesu tomak entaun ne’e parte responsablidade boot nune’e fó formasaun ba brigadista sira atu apár prosesu tomak hodi implementa iha baze,” Diretór STAE Baucau, Lúcio Freitas Salvador,” ko’alia iha Sentru Konvensaun Baucau (CCB, sigla portugés), segunda ne’e.

Brigadista sira mak sei halo rekrutamentu ba poling staf  tuir kompeténsia ne’ebé atribui ba sira liuhosi koordenasaun ho autoridade komunitária sira tanba eletór sira iha baze inklui eleisaun mós sei realiza iha baze.

Matéria inportante iha formasaun durante loron-tolu, hahú hosi 21 to’o 23 fevereiru nu’udar kna’ar brigadista sira-nia, serbisu poling staf  hanesan sekretaria estasaun votu, ofisiál indentifikasaun buletin votu, ofisiál no ofisiál tinta.

“Kompeténsia ne’ebé atribui ba sira tuir dekretu-lei númeru 15/2021 kona-ba kna’ar brigadista sira-nia, tanba sira mak sei lidera sentru votasaun,” Lúcio akresenta.

Xefe Departementu Rekursu Umanu STAE Nasionál, Adolfo Natalia da Silva, esplika, dekretu-lei númeru 15/2021 determina ona katak brigadista sira presiza iha formasaun durante loron tolu nune’e brigadista sira kontinua fó formasaun ba poling staf sira ne’ebé tuir planu sei realiza iha loron 5 to’o 9 fulan-marsu.

“Ita hakarak durante loron-tolu ita hakarak hanorin sira ho di’ak, imparsiál, onestidade atu nune’e bele garante iha eleisaun tuir mai,” Adolfo hateten.

STAE garante rekursu umanu sei sufisiente tanba sei halo rekrutamentu tán ba funsionáriu kontratadu poling staf hamutuk na’in-15.000 iha territóriu nasionál, enkuantu munisípiu Baucau na’in-1.500.

Totál sentru votasaun iha munisípiu Baucau hamutuk 125 no estasaun votu 150 ho tótal eleitór hamutuk na’in-96.391.

Jornalista   : Natalino Belo

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here