Ministériu Interiór (MI) liuliu Sekretáriu Estadu Protesaun Sivil (SEPS) simu ona karreta bombeiru hitu.imajen/Natalino Costa

DILI, 21 fevereiru 2022 (TATOLI)— Ministériu Interiór (MI) liuhosi Sekretáriu Estadu Protesaun Sivil (SEPS) simu ona karreta bombeiru hitu,  ne’ebe kontrata kompañia Silias Unipesoál Lda, sosa ho orsamentu 2021 hamutuk $949,888.00. 

“Ohin, ita halo seremonia entrega karreta kombate inséndiu 7 ne’ebé hola hosi kompañia Silias Unipessoal LDA mai Sekretária Estadu Protesaun Sivil (SEPS), atu ajuda servisu pesoál Bombeiru iha tereñu, liuliu atu halo atendimentu ba kestaun inséndiu sira no kestaun emerjénsia sira seluk,” Sekretáriu Estadu Protesaun Sivil (SEPS), Joaquim Gusmão, hateten ba jornalista sira iha edifisiu SEPS-Caicoli, segunda ne’e.

Orsamentu ba akziasaun karreta hitu ne’e, mai hosi osamentu SEPS nian tinan 2021 ho montante $949,888.00.

“Ita loke konkursu iha 2021 no kompañia Silias Unipesoál Lda, maka manán, nune’e nia maka halo akizasaun ba karreta sira ne’e, nune’e ohin kompañia ne’e entrega ona mai iha ita,” nia akresenta.

Veatura bombeiru ne’e importante tebes ba Korpu Servisu Bombeiru, hodi halo atendimentu servisu emerjénsia sira. Nune’e tempu badak distribui ba munisipiu sira ne’ebé maka presiza karreta kombate inséndiu, hanesan iha munisípiu Suai.

“Ita haree viatura bombeiru ba kombate inséndiu nian ne’e balun tinan 10 no balun tinan 20 ona ita presiza halo modernizaun ba ekipamentu sira ne’e mak iha OJE 2021 ita hahú halo akizasaun ona no OJE 2022 ita sei kontinua halo akizasaun ba karrreta kombate inséndiu 16 ho ida ne’e bele kompleta ona servisu bombeiru sira nia iha munisípiu sira,” nia afirma.

SEPS kontinua fó formasaun ba Pesoál Servisu Bombeiru, maski ekipa korpu bombeiru sei minimu tebes atu hala’o serbisu emerjénsia sira tanba korpu bombeiru ema na’in 32 iha kada korpu, maibé seidauk kompleta.

Nune’e, iha OJE 2021 SEPS halo ona rekrutamentu ba korpu bombeiru Ermera, Manatuto, Liquiça, maibé seidauk sufisiente, nune’e sei kontinua halo rekrutamentu no halo kapasitasaun atu aumentu aposta ba kualidade.

Iha biban hanesan, Diretór Kompañia Silias Unipessoal Lda, Matias Araújo Duarte, informa nia hetan fiar husi SEPS ba halo akizasaun ba karreta kombate inséndiu hamutuk hiitu.

“Karreta sira ne’e hola hosi Indonézia ho osan montante $949,888.00,” nia akresenta.

Karreta bombeiru hitu ne’e ho tipu marka hanesan Auto Commando Vehicle ho modelu toyata Hilux 4×4 WD  hamutuk tolu ho folin kada unit $46,696, nune’e karreta tolu ne’e hamutuk $140,088,00,  Auto Tanque Pesado (ATP) ho modelu Hino FM260JD iha ida ho kustu $184,800.00, fire Rescue Vehicle ho modelu Hino Dutro 130DHL iha ida ho folin $150,000.00, Prontu Socorro Urbanu (PSU) ho modelu Mercedes Benz Axor 2528 C iha ida ho kustu $235,000.00 no Prontu Soccoro Mediu (PSM) ne’ebe ho modelu Mercedes Benz Axor 2528C iha ida ho kustu $240,000.00.

Jornalista: Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here