Sekretáriu Estadu Komunikasaun Sosiál, Merício Juvinal dos Reis ‘Akara’. Imajen TATOLI/Egas Cristóvão

DILI, 21 fevereiru 2022 (TATOLI)-Sekretáriu Estadu Komunikasaun Sosiál (SEKOMS),  Merício Juvinal dos Reis “Akara”, informa fulan-abril tinan ne’e nia parte sei entrega estatutu estabelesimentu institutu formasaun jornalista ba Ministru asuntu Parlamentár no Komunikasaun Sosiál (MAPKOMS), Francisco Jerónimo, hodi aprezenta iha Konsellu Ministru (KM).

Notísia relevante: Estabelesimentu Institutu Formasaun ba Jornalista atinje ona 70%

“Ha’u fó ona deadline, abril ne’e ha’u sei entrega ba Ministru hanesan draf ho dokumentu ne’ebé mak iha hodi konsidera lori ba Konsellu Ministru”, Akara ba jornalista sira hafoin loke atividade formasaun iha Sentru Formasaun Téknika Komunikasaun (CEFTEK, sigla portugés) iha salaun Ministériu Solidariedade Sosiál no Inkluzaun (MSSI), Kaikoli, ohin.

Governante ne’e akresenta, durante ne’e CEFTEC mak hanesan sentru ida hodi fó formasaun ba formandu sira iha nível nasionál, tanba ne’e VIII Governu iha polítika ida atu hasa’e nível CEFTEC ba Institutu Profesionál ida.

“Tanba ne’e, ekipa halo hela servisu, estudu mós iha ona, konsultasaun iha ona no estatutu mós agora prepara hela, entaun ha’u sei husu téknika atu finaliza, nune’e ha’u entrega ba Ministru bele lori ba diskute iha Konsellu Ministru, hafoin iha Konsellu Ministru mak sei deside hakarak hela ho CEFTEC nafatin ka bele hasa’e nivel ba Institutu profesionál”, katak nia.

Polítika VIII Governu, nia hatutan, tinan lima nia-laran harii institutu profesionál ida atu evita haruka ita-nia ema ba tuir formasaun iha rai liur, hanesan nível báziku intermediáriu bele halo iha ne’e, maibé ba nível avansadu ne’ebé labele halo iha ne’e mak ita halo selesaun hodi apoia ba tuir formasaun iha rai liur.

Polítika ne’e di’ak entermus ekonomia bele halo poupansa, tanba osan bele sirkula iha Timor-Leste, dehan tan Akara.

“Ita lori formadór hosi rai liur mak mai fó formasaun ba ema barak hanesan 100 ka 200 duke ita haruka ba, dala ruma na’in 10 de’it, tanba kustu boot liu. Tanba ne’e, atu evita ita-nia osan sirkula iha rai liur no ita hasai gastu ne’ebé boot entaun ita hakarak harii institutu ne’e. Maibé, ida ne’e depende ba desizaun Konsellu Ministru, ne’ebé ekipa prontu hela atu avansa nafatin ho CEFTEC mós prontu no atu harii institutu profesionál mós prontu, tanba preparasaun ne’e tinan tolu ona”, nia afirma.

Jornalista  : Nelia Fernandes

Editora      : Rita Almeida  

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here