Sekretáriu Estadu Komunikasaun Sosiál (SEKOMS), Merício Juvinal dos Reis “Akara”, segunda ne’e ofisiálmente loke atividade formasaun Sentru Formasaun Téknika Komunikasaun (CEFTEC-sigla portugés) ba tinan 2022. Imajen CEFTEK

DILI, 21 fevereiru 2022 (TATOLI)-Sekretáriu Estadu Komunikasaun Sosiál (SEKOMS),  Merício Juvinal dos Reis “Akara”, segunda ne’e ofisiálmente loke atividade formasaun Sentru Formasaun Téknika iha Komunikasaun (CEFTEC-sigla portugés) ba tinan 2022.

“Objetivu hosi formasaun ne’e hasa’e kapasidade timoroan sira ne’ebé servisu hanesan mídia officer iha ministériu sira, instituisaun defeza no seguransa hanesan F-FDTL no PNTL”, Merício Akara ba jornalista sira iha salaun Ministériu Solidariedade Sosiál no Inkluzaun (MSSI) Kaikoli.

Governante ne’e hatete formandu ne’ebé tuir formasaun iha CEFTEC ba tinan ne’e hamutuk 184. Hosi númeru ne’e, sira sei aprende iha área multimédia, rádiu, hakerek notísia, televizaun, tetum no portugés.

Iha fatin hanesan, Koordenadór Interinu CEFTEC, Rafael da Silva Freitas, hateten formasaun tinan 2022 ba unidade ualu mak hanesan portugés ba jornalizmu, lia-tetun ba jornalizmu, hakerek imprensa, rádiu, televizaun, multimédia, relasaun publika no prótokolu no unidade jestaun komunikasaun no krize.

“Formandu 184, hosi númeru ne’e iha 60 resin mai hosi linã ministeriál no 10 resin hosi sentru formasaun suku ne’ebé mak ita instala. Alende ne’e, formandu balun mai hosi mídia officer no jornalista sira ne’ebé mak iha instituisaun publiku no privada iha territóriu nasionál”, nia afirma.

Serimónia ne’e SEKOMS hala’o mós lansamentu ba módulu formasaun CEFTEC no lian-portugés ba jornalista no estudu viabilidade kona-bá nesesidade formativa jornalista sira iha Timor-Leste hosi Consultório Lingua Para Jornalista (CLJ).

Enkuantu, partisipante iha serimónia abertura formasaun mak Prezidente Interinu Konsellu Imprensa, Koordenadór CEFTEC, Xefe Gabinete MAPKOMS, formadór sira hosi CLJ, formadór no formandu sira hosi CEFTEC.

Notísia relevante: CEFTEC-CLJ realiza formasaun portugés faze daruak ba órgaun komunikasaun sosiál

Jornalista  : Nelia Fernandes

Editora      : Rita Almeida  

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here