Komandante PNTL, munisípiu Bobonaro, Superintendente Antoninho Mau-luta. Imajen Tatoli/Sérgio da Cruz.

BOBONARO, 21 fevereiru 2022 (TATOLI) – Polísia Nasionál Timor-Leste (PNTL) hosi komandu munisípiu Bobonaro, preparadu asegura kampaña eleisaun prezidensiál ne’ebé sei realiza iha loron 2 fulan-marsu tinan 2022.

“Planu kona-ba seguransa nian remata ona, ohin ka aban ita avansa ba iha nasionál, ne’ebé komandu munisípiu Bobonaro preparadu hotu ona atu garante seguransa ba kampaña eleisaun prezidensiál to’o eleisaun tanba buat hotu feitu hotu ona,” Komandate  PNTL Munisípiu Bobonaro, Superintendente Antoninho Mau-luta, informa ba Agência Tatoli, iha Jináziu Maliana, segunda ne’e.

Maske membru sira preparadu ona, maibé presiza mós kontribuisaun husi apoiante no militante sira hosi kandidatura prezidente repúblika nian, atu apoia serbisu PNTL nian iha terrenu nune’e kontribui ba pás no estabilidade.

“Ita hotu-hotu tenke sente iha ita-nia fuan katak rai ida-ne’e munisípiu ida-ne’e ita hotu nian, tanba ne’e mak Bobonaro-oan tenke prontu atu hamutuk ho PNTL atubele hatudu ba munisípiu sira seluk katak Bobonaro mós bele realiza eleisaun ho hakmatek,” Mau-luta fó hanoin.

Maske preparadu ona maibé komandu PNTL Bobonaro sei enfrenta hela difikuldade kona-ba transporte no menus membru efetivu tanba daudaun ne’e iha de’it efetivu na’in-148 ativu hela, maibé hosi númeru ne’e iha membru na’in-haat mak iha kondisaun grave no labele  koloka sira atu halo seguransa.

Maske membru efeitivu limitadu, maibé komandante  ne’e  sei koordena ho Komandu Operasaun Espesiál (COE, sigla portugés) no Batallaun Orden Públika (BOP) postu Maliana, Unidade Patrulamentu Fronteira (UPF) no FALINTIL-Forsa Defeza Timor-leste (F-FDTL) postu Tunubibi.

“Difikuldade sira-ne’e ami aprezenta ona ba nasionál, ne’ebé ida-ne’e la sai barreira ida ba ami PNTL atu fó seguransa, maibé ami iha vontade ho laran badinas atu serbisu, tanba komandu jerál rona ona ami-nia preokupasaun ne’ebé tempu badak distribui ona transporte mai ami atu garante seguransa iha kampana,” nia katak.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here