Prezidente Parlamentu Nasionál (PPN), Aniceto Longuinhos Guterres Lopes. Imajen TATOLI/Francisco Sony.

DILI, 21 fevereiru 2022 (TATOLI)-Parlamentu Nasionál (PN), iha segunda (21/02) ne’e, kria ona komisaun eventuál hodi akompaña prosesu luta ba auto-determinasaun povu Sahara Osidentál.

Durante plenaria kada Bankada Parlamentár indijita sira-ninia reprezentante hodi hola parte iha Komisaun Eventuál ne’e.

Notísia Relevante :PN aprova $50.000 akompaña povu Sahara Osidentál nia auto-determinasaun

Husi Bankada Fretilin, aprezenta membru efetivu ba  komisaun eventuál  hanesan Deputadu David Dias Ximenes ‘Mandati’, Lidia Norberta  no  suplente  José Sequeira  ‘Somotxo’ ho  Abilio Quintão Pinto.

Bankada CNRT nian maka Deputada Veneranda Lemos no  Aderito Hugo, no Duarte  Nunes ho Carmelita Moniz hanesan suplente.

Enkuantu, husi PLP maka  Deputadu Abel Pires no suplente Rozalina Ximenes, partidu KHUNTO, Antonio Verdiál, Partidu Demokrátiku,  António Conceção, UDT maka Francisco David Xavier.

Husi Frente Mudansa designa membru efetivu maka Isabel Maria Ximenes no ikus liu PUDD, António de Sa Benevides nu’udar membru efetivu.

“Kona-ba kompozisaun komisaun eventuál ba Sahara Osidentál nian naran Deputadu ne’ebé bankada ida-idak indijita mai ohin anúnsiu hotu ona. Agora atu  hili prezidente, vise ho membru  komisaun eventuál mak  meza sei halo konvokatóriu tanba iha rezolusaun la dehan nune’e sei hola inisiativa,” Prezidente Parlamentu Nasionál, Aniceto Longuinhos Guterres Lopes, hateten iha plenária.

Povu Sahara Osidentál ninia luta ba auto-determinasaun durante tinan 19 ona tanba Maroko mak viola cesar fogo.

Enkuantu, Sahara  Osidentál nu’udár territóriu ne’ebe disputa iha nordeste tasi Áfrika nian no seidauk indepedente. Sahara baliza ho Arjélia nordeste, ho Maroko parte norte no Mauritánia Leste no Súl.

Sidade Sahara Osidentál lokaliza iha El Aaiún ho luan 266.00 kilometru kuadradu iha kontinente Áfrika, ne’ebé uza moeda Dirham Maroko no uza língua ofisiál Árabe.

Iha parte seluk, iha plenaria segunda ne’e, PN mós anúnsia  ba indikasaun deputadu na’in rua hosi bankada Fretilin hanesan membru efetivu Fabião Oliveira, Gabriela Alves no  suplemente Luis Geraldo hodi integra iha delegasaun Parlamentu Nasionál ba Assembleia Parlamentár komunidade nasaun ko’alia lian portugés  (CPLP, siglá portugés).

Notísia Relevante :Prezidente Repúblika Apoia Direitu Auto-Determinasaun Povu Sahara Osidentál

Jornalista:Nelson de Sousa

Editór : Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here