Ekipa Lafaek U-23 hakat ba semifinal torneiu AFF. Imajen espesial.

DILI, 20 fevereiru 2022 (TATOLI) –  Ekipa Lafaek U-23 lideradu Fabio Maciel hakat semifinál hafoin ‘tebe-sai’ ekipa Kamboja iha tornéu futeból Sudeste Aziátiku (AFF, sigla inglés) nune’e ekipa Timor-Leste hakat ba semifinál.

Ekipa Timor – Leste konsege konkista vitoria iha jogu ikus grupu A kontra Kamboja ho rezultadu 1-0. Golu únika ne’e marka hosi jogadór João Bosco ho kamizola 16. Jogadór uza esperiénsia individu hodi marka golu brillante ne’e. Jogu ne’e hala’o Estádiu Kamboja, domingu kalan.

Hosi vitória ne’e ekipa Timor – Leste iha direitu absoluta hetan tikete ultrapasa ba jogu semifinál AFF U-23 époka 2022 ne’e.

Bainhira parte dahuluk iha menutu dahuluk hahú, ekipa rua lansa kedas kontra no atake maibé ekipa ne’ebé lidera hosi treinadór Brazilleiru Fabio Maciel la fó fatin ba ekipa uma-na’in Kamboja atu marka golu.

Ekipa Lafaek hatudu jogu bonitu tanba maioria jogadór sira fiar-malu no unidu tebes iha kampu laran. Hosi unidu ne’ebé jogadór Timor – Leste halo ekipa Kamboja bók-an ladi’ak.

Esforsu hirak-ne’ebé ekipa Timor – Leste halo la hela de’it hanesan esforsu tanba iha menutu 17 bola barullu maka’as iha área Kamboja nian, hodi fó oportunidade ba jogadór João Bosco (16) lansa sutu ida ba rede kambodia ho rezultadu ba 1-0.

Rezultadu ne’e halo ritmu Timor – Leste nian sa’e maka’as liután nune’e ekipa Kamboja fó presaun ba área Timor-Leste nian, maibé ekipa Lafaek la fó fatin. Nune’e jogu parte dahuluk Timor-Leste lidera ho rezultadu 1-0.

Tama ba segunda parte ekipa rua nafatin lansa kontra no atake. Maibé jogu to’o minutu 90 no aumenta tán menutu 5, laiha tán golu ruma mak akontese.

Iha tabela klasifikasaun grupu A Timor-Leste lidera ho pontu hitu, enkuantu Kamboja ho pontu neen.

Antes ne’e, Timor – Leste empata ho Filipina 2-2, iha jogu segundu Timor – Leste mantein iha nia pozisaun hodi manán Brunei Daru Salam 3-1 no jogu ikus hasoru Kamboja manán 1-0.

Tanba ne’e Timor – Leste prepara an hodi ba kompete ho nasaun jigante sira seluk iha semifinál.

Jornalista   : Hortencio Sanches

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here