Diretór Verifikasaun no Lisensa Liga Futeból Timor-Leste (LFTL), José Carvalho. Imajen/LFTL.

DILI, 21 fevereiru 2022 (TATOLI)— Diretór Verifikasaun no Lisensa Liga Futeból Timor-Leste (LFTL), José Carvalho, hateten hahú ohin (21/02) to’o (21/03) loke ona janela transferénsia ba klube 19 ne’ebé hamahan an iha LFTL hodi halo rejistu ba jogadór nune’e bele partisipa iha liga époka ne’e.

“Ohin, ami loke ona janela transferénsia ba jogadór nasionál no ba jogadór internasionál ami hetan ona konfirmasaun hosi parte Federasaun Futeból Timor-Leste (FFTL) no loke ona tuir kriteria no oráriu   Asian Football Confederation (AFC) nian loke ona iha 10 fevereiru to’o 10 marsu,” José Carvalho hateten ba jornalista-sira iha edifisiu LFTL Dili, segunda ne’e.

Tanba ne’e, nia husu ba klube hotu atu hakbesik an ba edifisiu LFTL hodi rejista naran jogadór sira nune’e bele kompete iha liga tinan 2022 nian.

“Númeru rejistu ba jogadór sira ita sei la halo mudansa, iha tinan kotuk liu ba mosu pandemia COVID-19 ne’ebé ami fó klube ida bele rejistu jogadór to’o na’in 30 resin, maibé agora buat hotu fila ba normál kada klube iha jogadór na’in 27 de’it sei la liu hosi ne’e,” nia afirma.

Iha époka ne’e kompetisaun sei la’o nakonu iha tinan ida nia laran, tuir kalendáriu tentativa ne’ebé iha ona sei hahú 21 abríl no ramata iha 12 novembru tinan ne’e.

Entretantu, jogu ba primeira divizaun ba primeira volta no segunda volta sei halao iha Estádiu Munisipál Dili no Estádiu Gleno ho total jogu 90 ba klube 10 ne’ebé tuur hela iha primeira divizaun. Enkuantu ba segunda divizaun klube sia (9) sei joga de’it iha Estádiu Munisipal Dili hamutuk jogu 36.

Oráriu tentativa hosi Liga Futeból Timor-Leste (LFTL). Imajen/LFTL

Alende ne’e, iha jogu tasa 12 Novembru sei joga hosi klube 19 no nafatin hosi sistema vota fora ou lakon sai hamutuk jogu 18.

Klube 19 ne’e mak hanesan primeira divizaun AD SLB Laulara, AS Ponta Leste, Karketu Dili FC, Assalam FC, Emanuel FC, Aitana FC, Lalenok United FC, Atletico Ultramar, Academica FC no Porto Taibessi FC.
Segunda Divizaun mak hanesan, Kablaki FC, Nagardjo FC, DIT FC, Lica Lica Lemora FC, AS Marca, FIEL FC, Zebra FC no Boavista FC Timor.

Ho kalendariu ne’ebé iha ona fó impaktu ba klube balun ne’ebé maioria jogadór joga iha selesaun nasionál. Tanba iha tinan ne’e Timor-Leste sei partisipa iha jogu Sea Games Futeból mós sei reprezenta hosi selesaun nasional U-23 iha maiu nia laran mak LFTL fó oportunidade ba klube sira bele rejistu jogadór internasional ne’ebé reforsa sira nia klube hamutuk na’in-neen.

Tanba iha tinan sir aba kotuk LFTL autoriza jogadór internasionál tama iha klube ida iha limitasaun ho másimu na’in-haat labele liu, maibé tanba situasaun LFTL bele autoriza to’o na’in neen.

Notísia relevante:  Inísiu 2021, LFTL loke janela transferénsia

Jornalista: Hortencio Sanchez

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here