Diretór STAE munisípiu Bobonaaro, Mariano Viegas Amaral. Imajen Tatoli/Sergio da Cruz.

BOBONARO, 21 fevereiru 2022 (TATOLI) – Diretór Sekretariadu Tékniku Administrasaun Eleitorál (STAE) munisípiu Bobonaro, Mariano Viegas Amaral, husu brigadista sira tenke presta serbisu ho responsabilidade iha eleisaun prezidensiál.

“Idak-idak kuda sentidu nasionalizmu no patriotizmu iha fuan nune’e bele presta serbisu ho responsablidade no profisionál tuir regulamentu no regra eleisaun nia ne’ebé konsagra ona iha konstituisaun RDTL,” nia ko’alia iha atividade formasaun ba brigadista no ofisiál sira iha Jináziu Maliana, segunda ne’e.

Diretór STAE ko’alia asuntu ne’e bainhira realiza formasaun hodi kapasita brigada na’in-130 no ofisiál postu sira, hodi prepara ba eleisaun prezidensiál.

Nia fó hanoin ba brigadista sira tenke kolabora malu, serbisu hamutuk iha sentru votasaun sira nune’e eleitór sira mak eskolla kandidatu sira tuir sira-nia hakarak.

“Tanba rai ne’e ita mak na’in, ne’ebé labele hamosu fraude, tanba ne’e agora ita tenke esforsu maka’as atu ita-nia públiku bele satisfaz ho rezultadu kandidatu sé mak liu ita hotu nian,” nia katak.

Nia fó-sai katak, Bispu Dioseze Maliana husu STAE no CNE tenke serbisu ho transparánsia iha eleisaun prezidensiál.

“Ita-nia amu Bispu mós la husu buat barak, maibé nia husu de’it ba órgaun eleitorál CNE ho STAE, atu evita manipulasaun, tanba kandidatu ida liu ho transparánsia ho imparsialidade rezultadu susesu, maibé mosu fraude eleitorál rezultadu ema sei krítika signifika rezultadu ladi’ak,” nia haktuir.

Brigadista hosi postu administrativu Atabae, Octavio Paulo Xavier Araújo, hateten nu’udar hanesan Timor-oan prontu hala’o serbisu ho profiionál tuir lei eleitorál sira haruka hodi garante prosesu eleisaun iha munisípiu Bobonaro la’o ho rezultadu pozitivu.

Brigada munisipiu Bobonaro na’in-130 partisipa hela formasaun, hodi prepara ba eleisaun prezidensiál. Imajen Tatoli/Sergio da Cruz.

“Ami hetan ona formasaun kona-ba ami-nia devér saida mak sei halo iha eleisaun, kona-ba lei no regulamentu eleisaun nian, tanba ne’e ami fiar katak sei la hamosu fraude ruma,” nia garante.

Tuir dadus ne’ebé iha totál brigadista iha munisípiu Bobonaro hamutuk na’in-130. Hosi númeru ne’e destaka ba iha sentru votasaun sira iha postu adminiístrativu Atabae na’in-13, Balibo na’in-20, Bobonaro na’in-40.

Nune’e mós Cailaco na’in-15, Lolotoe na’in-14 no postu administrativu Maliana Vila na’in-28 hodi asegura materiál sensitivu no la’ós-sensitivu sira iha eleisaun prezidensiál.

Jornalista         : Sérgio da Cruz

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here