Administradór postu administrativu Baucau Vila, Isencinio António da Silva. Imajen Tatoli/Natalino Belo.

BAUCAU, 21 fevereiru 2022 (TATOLI) – Administradór postu administrativu Baucau Vila foun hahú orienta xefe suku 11 atu atualiza dadUs populasaun nune’e bele falisita serbisu administrativa.

Administradór postu administrativu Baucau Vila, Isencinio António da Silva, hateten, fulan-fevereiru laran sei aprezenta-aan ba xefe suku sira inklui orienta kedas atu submete totál populasaun bazea ba kategoria kada suku.

“Suku 11 ita fó hatene ona atu rekolla dadus mai, nune’e ita bele halo planu ba oin bazea ba dadus ne’ebé ita iha postu Baucau vila,” nia informa Agência Tatoli, iha Vila Antiga, segunda ne’e.

Isencinio esplika, serbisu administrasaun importante tebes nune’e planu refere sai prioridade dahuluk iha nia mandatu tanba hakarak atu hatene dadus populasaun nian bazea ba kategoria iha suku hanesan vulnerável, invalidés, edukasaun nune’e bainhira iha implementasaun planu programa ruma bele submete lalais ba administrasaun munisipál.

“Ne’e parte hosi ita-nia serbisu loloos, hanesan parte preparativu mesmu tinan-ne’e laiha orsamentu ba Programa Dezenvolvimentu Integradu Munisipál (PDIM),” Isencinio akresenta.

Bainhira kaundu xefe suku sira submete dadus, parte administrasaun postu mós sei indetifika suku ne’ebé mak presiza ba oin atu fó prioridade hanesan dezenvolvementu infraestrutura bázika estrada, bee-moos no eletrisidade.

Totál populasaun iha postu administrativu Baucau Vila tinan 2021 nian hamutuk na’in-57.009 kompostu hosi suku Bahú na’in-11.562, Bucoli hamutuk  na’in-3.363.

Nune’e mós suku Buibau na’in-5.728, Buruma na’in3.638, Caibada na’in-4.349, Gariuai na’in-5.785, Samalari na’in-2.472, Seisal na’in-2.262, Tirilolo na’in-10.185, Troloka na’in-2.750 no Uailili na’in-4.915.

Jornalista   : Natalino Belo

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here