Membru F-FDTL hala'o marsa ho bandeira RDTL iha ámbitu komemorasaun aniversáriu Komponente Sentru Formasaun no Treinu (SFT) ba-dala 21 iha Kampu SFT Metinaro, sábadu (19/02). Imajen Tatoli/Francisco Sony

DILI, 19 fevereiru 2022 (TATOLI)— Xefe Estadu Maiór FALINTIL-Forsa Defeza Timor-Leste (F-FDTL), Donaciano do Rosário Costa Gomes “Pedro Klamar Fuik”,  husu ba membru Forsa Armada hotu atu banati erói libertasaun sira hodi serbí Estadu.

Xefe Estadu Maiór hato’o asuntu ne’e iha ámbitu seremonia komemorasaun aniversáriu Komponente Sentru Formasaun no Treinu (SFT) FALINTIL-Forsa Dezefa Timor-Leste, (F-FDTL) ba dala-21, iha Metinaro, sábadu ne’e.

Xefe Estadu Maiór FALINTIL-Forsa Defeza Timor-Leste (F-FDTL),Donaciano do Rosário Costa Gomes “Pedro Klamar Fuik”,  Imajen Tatoli/Francisco Sony

“Ha’u husu ba membru F-FDTL foun sira, la’o tuir ita-nia eroi sira-nia liafuan ne’ebé hateten, “apredender para saber, saber para kumprir” liafuan murak ida ne’e maihosi esperénsia, sakrifísiu militár barak nian, ne’ebé hakarak katak militár foun ida atubele hametin nia karaktér, identidade, kultura militár nian tenke haree beibeik ba referénsia ne’ebé mak hanaran instituisaun Komadante Nicolau Loubato ka SFT,” Komodoro Pedro Klamar Fuik hateten iha SFT Metinaro.

Xefe Estadu Maiór F-FDTL ne’e esplika SFT uluk hanaran Sentru Instrusaun Komadante Nicolau Lobato, maibé ikus mai transforma ba SFT, ne’ebé ohin halo ona nia tinan 21, ne’ebé  durante ne’e dezenvolve forsa armada liuliu haree ba formasaun militár sira nian, ne’ebé haree ba iha formasaun baze hanesan militár liuliu foku ba vida militár ida ho profisionalizmu.

Nune’e, Komodoro Pedro Klamar Fuik dehan sidadaun ne’ebé tama vida militár tenke sai tuir foti ezemplu ka referénsia hosi Nicolau Loubatu nian, no komandante kombatente barak ne’ebé mak mate hanesan alisérse ba rai ida ne’e. Tanba bainhira sira mate husik mak sira-nia korajen hanesan dedikasaun, empenamentu ne’ebé mak selu rasik ho sira-nia vida atu liberta rai ida ne’e.

Xefe Estadu Maiór  F-FDTL, Komodoro Donaciano do Rosário Costa Gomes “Pedro Klamar Fuik” hala’o pasa revista formatura membru F-FDTL iha ámbitu komemorasaun aniversáriu Komponente Sentru Formasaun no Treinu (SFT) ba-dala 21. Iha Kampu SFT Metinaro, sabadu (19/02). Imajen Tatoli/Francisco Sony

Iha fatin SFT ida ne’e, membru F-FDTL hahú fó formasaun ba karakter militár nian hodi aprende vertude, hahalok di’ak liuhosi elementu importante tolu hosi militár nian mak lealidade, frontalidade no kamaradajen.

“Lealidade mak ita-boot sira aprende iha formatura, instrusaun hotuhotu, atu bele obedese superiór irárkiku, ba Estadu no sosiedade ka ema hotu ne’ebé mak sai hanesan matan, tilun, ibun ba ita-nia rai. Hanesan militár ho identidade militár, ita mós iha devér síviku hanesan sidadaun, vertude militár nian mak halo ita diferente sidadaun ida hanesan sidadaun militár,” Komodoro ne’e esplika.

Nune’e, nia husu ba membru F-FDTL hotu-hotu tenke hametin kultura militár tanba hili sai vida militár, tanba iha propozitu ida.

“Ita boot sira sai militár atu banati tuir, ita-nia militár sira ne’ebé mak mate rihun ba rihun iha kotuk ba, tanba orden (pangilan) ida, la’ós tanba servisu, karreira, maibé tanba orden ne’ebé bolu, no tanba sira-nia hakarak atu fó sira-ninia kontribuisaun no serbí hodi hetan libertasaun ne’ebé mak sei kontinua nafatin to’o oinsá mak Estadu bele liberta povu hosi mukit no kiak,” Xefe Estadu Maiór ne’e enkoraja.

Atuál Diretór Ezekutivu Insitutu Defeza Nasionál ne’e afirma, atu sai militár ho nian misaun mak serbí interese Estadu no nasaun nian, nune’e hametin identidad no kamaradajen tanba ida ne’e mak sai abut vertude militár nian.

Komandante Sentru Formasaun no Treiny (SFT), Tenente Koronél, Cezario Marçal Ximenes”Haksolok”. Imajen Tatoli/Francisco Sony

Iha biban hanesan, Komandante Komponente Formasaun no Treinu , Tenente Coronél Cesário Marçal Ximenes “Haksolok”, hateten iha komemorasaun aniversáriu SFT dala-21 hakarak kongratula estrutura tomak ne’ebé durante ne’e serbisu ho di’ak ba SFT.

“Tanba komponente sentru formasaun no treinu ne’e ba oin liuhosi servisu estrutura nian, la’ós tanba ha’u komandante mesak. Tanba SFT nia dever mak atu forma ema sai ema no eduka ema sai ema ne’ebé edukadu iha vida militár,” Tenente Coronél Haksolok kongratula.

Entretantu, iha aniversáriu SFT ba dala-21 ne’e, membru Komponente Sentru Formasaun no Treinu na’in-15 mós hetan sertifikadu louvor.

Notísia relevante:  Falur husu membru F-FDTL tane aas disiplina no loyalidade

Jornalista : Arminda Fonseca

Editor      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here