DILI, 19 fevereiru 2022 (TATOLI)— Grupu Aileba-oan hosi munisípiu Liquiça deklara apoia ba kandidatu Prezidente Repúblika períodu 2022-2027 ho númeru sorteiu 14, José Ramos Horta, ne’ebé hetan ona bensaun hosi lider istóriku, Kay Rala Xanana Gusmão.
“Ami Juventude Aileba-oan, nu’udar grupu independente ida ne’ebé la inklina ba organizasaun no partidu polítiku ruma, deklara hodi rai-lulik Timor-Leste nia naran katak, ami prontu fó apoiu másimu ba Kandidatu Prezidente Repúblika Premiadu Nobel da Paz, José Ramos Horta ba Prezidente Republika períodu 2022-2027,” Portavóz Juventude Aileba-Oan, Paulina Tanec da Silva Cono, hateten, liuhosi nota ne’ebé Agência Tatoli asesu, sábadu ne’e.
Grupu juventude sira ne’e apoia ba kandidatu Prezidente Repúblika, José Ramos Horta tanba konsidera Xanana no Ramos Horta bele hadi’a problema nasaun nian no hodi hadi’a hikas bens estár ba povu no nasaun nian.
Juventude Aileba-oan fiar katak Jose Ramos Horta ne’ebé hetan ona apoiu másimu hosi Lider Karismátiku Kay Rala Xanana Gumão hamutuk ho Partidu CNRT no partidu polítiku sira seluk, inklui grupu apoiante oin-oin iha duni kapasidade akumulativu hodi bele hakuak lider sira hotu, hahú hosi lider jerasaun tuan, jerasaun foun no lider kontinuadór sira atubele hala’o dezenvolvimentu iha rai ida ne’e.
Ho apoiu ne’ebé iha, Jiventude Aileba Oan fiar katak Premiadu Nobel da Paz José Ramos Horta iha pezu polítiku atu bele rezolve problema interna liuliu atu bele influênsia Governu, nune’e bele hadi’a ekonómia povu no garantia estabilidade polítika no seguransa iha rai-laran.
“Ami mós depozita ami-nia konfiansa tomak ba José Ramos Horta ne’ebé koñesidu iha mundu internasionál atu bele promove imajen Timor-Leste nian iha nivél rejionál no internasionál. Ho rajaun hirak ne’e hotu, mak ami prontu serbisu makaas nune’e bele fó vitória ba Jose Ramos Horta, atu lori ba tuur iha Palásiu Prezidente Nicolau Lobato Aitarak-Laran hodi serví povu no Nasaun Timor-Leste,” nia akresenta.
Ekipa juventude sira ne’e mós daudaun hahú servisu makas hodi sosializa informasaun ba povu sira iha Tibar liuliu esplika lista kandidatu Prezidente José Ramos Horta ne’ebé hetan númeru surteiu 14 hosi Tribunál Rekursu.
Grupu Juventude Aileba-oan ne’e rasik kompostu aldeia Turuleu, Fatunia, Mau-Soi no Libulelo, hosi suku Tibar postu administrativu Bazartete, munisípiu, Liquiça.
Notísia relevante: APEMF-MUF deklara apoia kandidatu PR Lú-Olo
Jornalista : Arminda Fonseca
Editór : Florencio Miranda Ximenes
