Ilustrasaun doasaun raan. Imajen hosi google

DILI, 18 fevereiru 2022 (TATOLI)— Grupu voluntáriu hosi Asosiasaun Turizmu Relijíozu Timor-Leste (ATR-TL) na’in-25 hala’o doasaun raan hodi apoia pasiente dengue ne’ebé baixa hela iha Hospitál Nasionál Guido Valadares (HNGV) no Sentru Saúde Internamentu sira.

“Ami hala’o doasaun raan ne’e hosi ATR-TL, ne’ebé mai hosi relijiaun sira ne’ebé mak iha Timor-Leste hanesan Katólika, Protestante, Hindu, Musulmanu no Konghucu, ho asaun ne’e atu hala’o ami-nia solidariedade ba moras sira hotu hotu iha ospitál liuliu ba moras dengue ne’ebé mak númeru sa’e maka’as,” Koordenadora ATR-TL, Glenda de Carvalho, hateten ba Agência TATOLI ne’e iha Vila-Verde, sesta ne’e.

Ekipa voluntáriu ATR-TL halo doasaun raan ba iha Hospitál Nasionál Guido Valadares (HNGV) liuliu banku Sangue ne’ebé mak estoke raan menus, nune’e hakarak hala’o solidariedade hodi fó tulun ba maluk sira ne’ebé mak oras ne’e presiza  raan.

“Atividade ne’e mós sei halo rutina fulan haat dala ida, atu ajuda raan ba ema seluk ne’ebé  mak presiza tanba ema sira mai rejistu ne’e hamutuk 50, maibé ema fó doasaun raan ne’e na’in-25,” Nia informa.

Iha fatin hanesan, Koordenadór Servisu Transfunsaun Raan Banku Sangue Nasionál, Tomas Adelino, hateten Asosiasaun ne’e husu banku sangue atu halo doasaun raan  ba sira, nune’e kongratula inisiativa ne’e tanba di’ak tebes atu apoia pasiente dengue ne’ebé númeru maka’as iha Dili no Timor-Leste.

“Kazu dengue númeru ne’ebé maka’as entaun ema barak presiza raan, nune’e ho inisitiva ne’e diak tebes tanba bainhira raan menus ne’e problema ba ami saúde tanba ema barak presiza raan mutin,” Koordenadór ne’e kongratula.

Nia dehan estoke raan iha HNGV ladun sufisiente tanba ne’e mak husu família pasiente tenke halo doasaun raan, atu nune’e estoke sira ne’e labele mamuk liu.

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here