Fatin turizmu we-lulik manas iha suku Waimori. Imajen/FB

DILI, 18 fevereiru 2022 (TATOLI)–Diretór Servisu Ministériu Obra Públika (MOP) munisípiu Viqueque, Mário do Rego, eziji autoridade munisipál husu Institutu Jestaun Ekipamentu, Instituto Públiku (IGE, I.P, sigla portugés) normaliza dalan liga bá fatin turizmu, Weluli manas lokaliza iha postu Viqueque villa.

“Dalan liga bá Weluli Manas ho kondisaun ladi’ak. Tanba ne’e, ita-nia autoridade lokál munisípiu Viqueque hato’o ona pedidu urjente ba IGE, I.P hodi normaliza , maibé to’o agora parte institutu seidauk mai halo,” Mário do Rego hateten ba Agência TATOLI, via telefónika, sesta ne’e.

Antes ne’e, Servisu Obra Públika Viqueque lori pedidu ba Administradór Viqueque atu asina, hodi submete ba MOP hodi haruka IGE, I.P normaliza dalan.

Bazeia ba identifikasaun Servisu Obra Públika Viqueque, dalan sira ne’ebé presiza halo normalizasaun maka hanesan hosi postu Ossu  liga bá  suku  Nahareka, Uaibobo,  postu Uatucarbau liga bá suku Batata, Afaloikai no postu Lacluta liga bá suku Ahic, tanba dalan sira ne’e hokondisaun a’at tebes.

Notísia relevante: Estrada kilómetru 4 asesu ba Weluli Manas Viqueque ho kondisaun a’at

Antes ne’e, Administradór munisípiu Viqueque, Januário Soares ‘Bolly’,  halo pedidu urjente ba IGE, I.P atu hadi’a dalan liga bá Weluli Manas, hodi  inaugura fatin turizmu ne’e.

Hatan ba kestaun ne’e, Prezidente Konsellu Administrasaun IGE, I.P, Hermenegilda da Costa Laurentina, hateten, bainhira autoridade sira submete ona pedidu presiza buka hatene.

“Ha’u hakarak husu autoridade sira, bainhira hatama ona pedidu mai ami, autoridade nia  devér maka tenki mai follow up atubele hatene prosesu to’o ona ne’ebé,  tanba ami ninia servisu atendementu ba territoriu tomak,” nia fó hanoin.

Tuir Hermenegilda da Costa, institutu bele loke estrada hodi fasilita movimentu iha fatin turístiku, maibé autoridade presiza hato’o pedidu hodi institutu bele ba rekolla dadus no konsellu administrasaun bele orienta ekipa ba terrenu.

Iha tinan 2021, iha pedidu 500 maka tama iha IGE, I.P, ne’ebé hosi númeru ne’e, iha pedidu 200 mak konsege finaliza ona no 300 mak seidauk finaliza ho razaun ekipamentu limitadu tebes.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here