Treinamentu tátika asisténsia seguransa ba entidade a’as iha Komandu UEP, Bairru-Pité, tersa (25/01). Imajen TATOLI/Arminda Fonseca

DILI, 18 fevereiru 2022 (TATOLI)—Membru Polísia Nasionál Timor-Leste (PNTL) hosi Komandu Unidade Espesiál Polísia (UEP) ka Korpu Seguransa Pesoál (CSP, sigla portugés) na’in-24, sesta ne’e, termina ona formasaun tátika asisténsia seguransa ba entidade a’as.

Komadante UEP, Superintendente Xefe, Orlando Gomes, husu ba membru ne’ebé ohin termina ona treinamentu inklui membru tomak atu kumpre nafatin dever, lei, no regra ne’ebé iha instituisaun laran.

“Ita labele halo atuasaun tuir ita-nia gostu, maibé tenke rona orientasaun hosi komandu, hodi ezekuta tuir ho profesionalizu hodi atende ita-nia povu no nasaun,” Orlando Gomes, relata iha Komandu UEP, Bairro-Pité.

Notísia relevante: Membru CSP na’in-24 partisipa treinamentu tátika asisténsia seguransa ba entidade a’as

Biban ne’e, nia agradese ba instrutór sira ne’ebé durante ne’e fó ona treinamentu ba membru na’in-24, nune’e hamutuk bele lori UEP sai di’ak liu agora no ba oin.

Membru UEP ne’ebé partisipa treinamentu ne’e kompostu hosi mane na’in-22 no feto na’in-rua, durante fulan-ida nia laran, hahú hosi fulan janeiru.

Nune’e mós, Segundu Komadante Jerál PNTL, Komisáriu Polísia, Mateus Fernandes, hateten, servisu Polísia sai hanesan ema hotu no PNTL rasik nia preokupasaun, nune’e bele serbisu ho profisionál.

“Polísia nia misaun sempre hasoru krime potensiál oinoin, tantu vertikál no horizontál, liga ho dinámika sosiál no globál ne’ebé ema enfrenta no situasaun sira ne’e Polísia mak sei enfrenta iha oin. Tanba ne’e, ha’u husu ba membru UEP foun sira ne’ebé ramata treinamentu, atu iha korajen nafatin hadomi imi-nia an hodi serví rai ida-ne’e, tanba liuhosi treinamentu bele eleva kapasidade atua situasaun difísil ruma ho rápidu,” nia tenik.

Segundu Komadante Jerál konsidera, Polísia iha pozisaun úniku, maibé tenke serví povu ho laran no fuan, nune’e populasaun sei depozita konfiansa.

“Husu ba imi atu prepara mental no fíziku ba serbisu rutina loron-loron, liuliu iha tempu badak sei hasoru situasaun hanesan Eleisaun Prezidensiál no Eleisaun Parlamentár, imi hotu tenke serbisu ho profisionál no neutru hodi hala’o serbisu seguransa, liuliu iha ámbitu kampaña ba eleisaun nian,” nia enkoraja.

Komandante Timor-Leste Police Development Programme (TLPDP), Dareen Boy, hateten, partisipante na’in-24 ne’ebé ohin termina treinamentu ne’ebé foka liuba kursu protesaun pesoál, di’ak tebes tanba hanorin seguransa sira halo atuasaun ba situasaun difísil nia laran liuliu ba entidade a’as sira.

“Ha’u hakarak rekomenda nafatin ba Komadante UEP atu motiva no fornese nafatin, kursu profesionalizmu ne’ebé agora daudaun ita-boot sira hala’o ne’e tanba papél seguransa pesoál ne’e importante tebes, iha nasaun ida,” nia dehan.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here