Diretór Administrasaun no Finansa hosi MEJD, Antoninho Pires. Imajen TATOLI/Egas Cristóvão

DILI, 18 fevereiru 2022 (TATOLI)–Ministériu Edukasaun Juventude no Desportu (MEJD) realiza ona rekrutamentu ajente administrasaun públika hamutuk 95 ho estatutu kontratadu, maibé hafoin liu prosesu finalmente ema na’in-57 mak selesionadu ba vaga ne’e.

Tuir Diretór Administrasaun no Finansa MEJD, Antoninho Pires, ajente administrasaun públika selesionadu iha prosesu rekrutamentu foin lalais ne’e, sei koloka iha Diresaun Nasionál Impresaun, Diresaun Nasionál Infraestrutura, Unidade Kurríkulu Nasionál, Diresaun Rekursu Umanu inklui Diresaun Nasionál Asaun Sosiál Eskolár atu sai pontu vokál iha munisípiu sira.

Notísia relevante: Kandidatu funsionáriu 93 husu PN fiskaliza prosesu rekrutamentu iha MEJD

“Finalmente ami la konsege prienxe vaga 95, maibé ami hetan de’it 57 mak submetidu tuir rezultadu ezame finál hosi prova eskrita no entrevista,” Diretór informa ba Agência TATOLI, iha ninia knaar fatin, Villa verde, sesta ne’e.

Tuir Antoninho Pires, maski númeru ne’e la sufisiente atu akumula forsa traballu iha nível diresaun sira, maibé sei tenta kondisiona tuir nesesidade ministériu.

“Pur enkuantu, ami sei uza lai ema ne’ebé iha, ami kontratu tuir nesesidade ministériu. Bainhira presiza tan mak ami sei loke vaga, maibé la presiza ona ami mantein de’it ona ho númeru ne’ebé iha,” nia akresenta.

Iha sorin seluk, MEJD tau hela atensaun ba vagatura 975 atu halo subsituisaun ba sira ne’ebé mate no reforma, tanba ne’e ministériu halo hela providénsia halo rekrutamentu atu prienxe fali fatin sira ne’ebé mamuk.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here