DILI, 18 fevereiru (TATOLI)—Juventude Partidu Frente Revolsionáriu Indepedente (Fretilin), sesta ne’e realiza konferénsia nasionál dahuluk ho tema ‘Hametin Identidade no Haburas Kultura Instituisionál atu Hatutan Mehi Fretilin Nian’.
“Juventude Fretilin buras daudaun no tenke sai unidu no forte liu atu sai organizasaun presiza tempu tasak didi’ak,” Sekretáriu Jerál Partidu Fretilin, Mari Alkatiri, hateten bainhira halo abertura ba konferénsia refere, iha Sentru Konvensaun Dili (CDD, siglá portugés), Dili.
Tuir nia, bainhira organizasaun ne’e moris iha ne’e hanoin tempu ida Fretilin esperimenta atu asume postura foun iha realidade konstelasaun polítika iha Timor-Leste maibé preokupasaun Fretilin atu harii organizasaun masa juventude Fretilin asume papél determinante.
“Partidu Fretilin iha organizasaun haat hanesan mós juventude Fretilin instituisaun ida atu buras no metin ba beibeik presiza tempu nune’e moris hanesan organizasaun preokupa povu tomak nia vida. Ha’u deseja koneferénsia ne’e la’o di’ak,” nia hateten.
Sekretáriu Jerál Juventude Fretilin, Abrão Saldanha Nokosiku, hateten objetivu dahuluk hosi konferénsia ne’e mak debate kona-ba vida organizasaun tanba konferénsia nasionál hanesan órgaun aas liu ba juventude Fretilin atu define liña polítika atuasaun ba tinan lima mai, no sei eleje estrutura foun órgaun sentrál juventude Fretilin.
Atuál Sekretáriu Estadu Juventude no Desportu (SEJD) ne’e relata, progresu servisu ne’ebé durante ne’e estrutura atuál hala’o ona mak harii estrutura hosi baze to’o nasionál, hahú formasaun polítika lubun hosi munisípiu balun no nasionál, partisipa mobilizasaun organizasaun kanpaña polítika iha eleisaun oioin no eleisaun interna partidu nian no kontribui ba partidu nia organizasaun nivél baze sira hotu.
Parte seluk, relasiona ho eleisaun prezidensiál 2022 no Juventude Fretilin nu’udar organizasaun masa partidu Fretilin nian ho posizaun hodi apoiu totál kandidatu Prezidente Repúblika períodu 2022-2027, Francisco Guterres Lú Olo.
Entertantu, konferénsia ne’e sei hala’o durante loron tolu 18 to’o 20 fevereiru ne’e no partisipa hosi 6611 hosi munisípiu 12 inklui juventude sira hosi Rejiaun Administrativa Espesiál Oé-Cusse Ambeno (RAEOA),
Jornalista : Nelson de Sousa
Editór : Cancio Ximenes
