Tékniku EDTL halo instalasaun eletrisidade iha área Bebora, Dili. Imajen TATOLI/António Gonçalves

DILI, 18 fevereiru 2022 (TATOLI)-Koordenadór Jestaun Merkadu Taibesi, António Manuel de Araujo, preokupa ho eletrisidade iha Merkadu Taibesi tanba eletrisidade iha merkadu ne’e mate ka la lakan kuaze tinan ida ona.

“Ha’u preokupa ba eletrisidade, tanba eletrisidade iha merkadu Taibesi ne’e seidauk lakan di’ak no sei nakukun hela. Hanesan iha área terminál, merkadu laran sai to’o mai iha edifísiu oin, ha’u haree lampu barak mak avaria iha tempu kalan. Ida-ne’e tuir ha’u-nia obrsevasaun iha merkadu,” António Manuel de Araujo hateten ba Agência Tatoli, iha nia knaar-fatin, Taibessi, Dili, sesta ne’e.

Problema ahi mate iha Merkadu Taibesi ne’e kuaze tinan ida-resin ona, hahú hosi tinan 2021 to’o mai agora seidauk lakan.

“Hosi ne’e, ha’u relata ona ba Autoridade Munisípiu Dili no ko kompeténsia bele haree ida-ne’e atu relata ba EDTL ka kompañia, tanba ne’e iha área merkadu Taibesi,” nia dehan.

Ho problema ne’e, negósiante sira kontinua hala’o sira-nia atividade negósiu, tanba sira uza meiu seluk hanesan uza lampada hodi faan sira-nia sasán iha tempu kalan.

“Maibé, ita hakarak lampu lakan ein jerál atu ita haree ne’e mak lampu sira agora sei mate hela ne’e,” nia dehan.

Enkuantu liga ba atividade iha merkadu Taibesi, nia hateten, atividade iha merkadu la’o normál, hanesan negosiante sira faan sira-nia sasán iha tempu loron no iha tempu kalan.

“Ha’u haree iha semana ida ba to’o fulan ida-ne’e situasaun iha merkadu laran la’o normál. Nune’e mós ba sirkulasaun transporte, sira-nia movimentu la’o normál,” nia dehan.

Xefe Departamentu Jestaun no Merkadu, Arthur Henriques, hateten liga ba ahi mate iha merkadu Taibesi nia parte seidauk simu informasaun hosi Koordenadór Jestaun Merkadu Taibesi.

“Ha’u seida’uk simu informasaun kona-ba ahi mate iha merkadu Taibesi, maibé ho informasaun ne’e orsida ha’u ba terenu hodi konfirma iha ne’ebá,” nia dehan.

Jornalista  : Nelia Fernandes

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here