Diretór Jerál Sekretariadu Tékniku Administrasaun Eleitoral (STAE), Acilino Manuel Branco. Imajen TATOLI/Egas Cristóvão.

DILI, 17 fevereiru 2022 (TATOLI)—Sekretariadu Tékniku Administrasaun Eleitorál (STAE) hamutuk ho reprezentante kandidatura Prezidente Repúbliku sei deside modelu buletin votu ne’ebè ideal ba eleisaun prezidensiál 2022 ne’ebé tuir kalendáriu sei realiza iha 19 marsu tinan ne’e.

Notísia Relevante: Kandidatu PR na’in-16 dada ona númeru sorteiu iha Tribunál Rekursu

“Ita sei hasoru reprezentante kandidatu PR atu haree ida-ne’e, tanba kestaun ida mak kuantidade buletin votu bo’ot ho kandidatura ne’ebé barak. Entaun modelu buletin votu primeiru boot liu iha eleisaun prezidensiál tinan ne’e,” Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten ba jornalista sira iha Caicoli, kinta ne’e.

Atu deside modelu vuletin votu presiza halo koordenasaun ne’ebè di’ak no ideal no nia konteúdu, sigla no fotografia tenke konkorda hosi reprezentante kandidatura Prezidente Repúblika sira.

Nune’e, nia dehan, buletin votu ba eleisaun prezidensiál 2022 sei imprime iha instituisaun públiku Gráfika Nasionàl, hanesan instituisaun Estadu nian preparadu atu emprime buletin votu bazea ba númeru eleitór iha Timor-Leste.

“Ohin, ita sei husu sira atu haruka ba STAE liu-liu segunda no tersa kona-ba sira-nia sigla, bandeira no fotografia sira, nune’e tékniku sira bele ajusta modelu buletin votu, tarde liu loron 23-24 Fulan ne’e halo apresiasaun ikus, nune’e bele hahú halo ona produsaun,” nia informa.

Bazea ba kalkulasaun, iha loron 09-10 fulan-marsu produsaun tenke ramata no sei haree atu transporta mós ba estranjeiru.

“Husu reprezentante kandidatura PR sira atu hatama lalais pedidu sira-ne’ebè mak iha atu halo ajustamentu modelu vuletin votu, nune’e ita bele emprime bazea ba kalendáriu,” nia hateten.

Enkuantu, Supremu Tribunál ba Justisa (STJ) liuhosi Tribunál Rekursu (TR), kuarta ne’e, realiza ona serímonia dada númeru sorteiu ba kandidatu Prezidente Repúblika 2022-2027 nain-16 ne’ebé admitidu iha prosesu verifikasaun atu kompete iha eleisaun Prezidensiál ne’ebé realiza iha loron 19 marsu tinan ne’e.

Kandidatura Prezidente Repúblika na’in-16 ne’ebé admitidu mak hanesan kandidatu hosi partidu CNRT José Manuel Ramos Horta, partidu KHUNTO Armanda Berta dos Santos, partidu FRETILIN Francisco Guterres Lú Olo, hosi PD Mariano ‘Aasanami’ Sabino Lopes, Partidu Demokrátiku da Repúblika de Timor (PDRT) Anacleto Bento Ferreira.

Kandidatu independente kompostu hosi Felisberto Araújo Duarte, Maria Helena Lopes de Jesus ‘Milena’ Pires, Maria Ángela Freitas da Silva, Isabel da Costa Ferreira, Hermes da Rosa Correia Barros, Tito da Costa Cristovão ‘Lere Anan Timur’, Rogério Tiago de Fátima Lobato, Virgílio da Silva Guterres ‘Lamukan’, Constâncio da Conceição Pinto, Antero Benedito da Silva no Martinho Germano da Silva Gusmão.

Notísia Relevante: CNE-STAE halo levantamentu ba empreza gráfika atu emprime buletin votu

Jornalista : Celestina Teles

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here