Polísia feminina Munisípiu Dili, liu na’in-25 tuir treinamentu fíziku no mentalidade hodi atua kuakér sitasaun krime no anarkizmu sira iha Dili-laran. Imajen/Eugénio Pereira.

DILI, 17 fevereiru 2022 (TATOLI)—Prezidente Repúblika, Francisco Guterres Lú Olo, husu Polísia Nasionál Timor-Leste (PNTL) atu hala’o knaar hodi asegura seguransa iha ámbitu eleisaun prezidensiál 2022, hahú hosi prosesu kampaña eleitorál to’o data eleisaun ho imparsialidade

Notísia Relevante: TR ofisializa númeru sorteiu ba kandidatu PR 2022-2027

“Prezidente Repúblika husu nafatin servisu buat ida imparsiál ne’e, importante atu asegura buat hotu la’o di’ak,” Komandante Jerál PNTL, Komisáriu Faustino da Costa, hateten ba jornalista sira hafoin ramata sorumutu ho Xefe Estadu, iha Palásiu Prezidensiál Nicolau Lobato, Bairru Pite, Dili, kinta ne’e.

Komisáriu PNTL relata, situasaun seguransa iha territóriu nasionál la’o di’ak no nia aprezenta preparasaun PNTL to’o iha ne’ebé, no koordenasaun halo nusa hodi asegura seguransa ba iha eleisaun prezidensiál ne’ebé sei realiza iha 19 marsu 2022.

“Ita preparadu sei koloka rekursu másimu membru PNTL hotu-hotu, hahú hosi kampaña eleitorál to’o eleisaun,” nia hateten.

Daudaun ne’e membru PNTL efetivu iha territóriu nasionál hamutuk 4014, ne’ebé prontu atu asegura eleisaun prezidensiál 2022 hodi bele hetan susesu.

Tuir Konstituisaun Repúblika Demokrátika Timor-Leste (KRDTL) artigu 147 (Polísia no forsa seguransa sira), iha alinéa 1 hateten polísia sei defende legalidade demokrátiku no garante sidadaun sira-nia seguransa internu maibé sira labele iha partidu polítiku.

Alinéa 2 haktuir, prevensaun kriminál tenke hala’o ho respeitu ba direitu umanu; no alinéa 3 hateten lei mak sei harii rejime ba polísia no mós forsa seguransa seluk.

Notísia Relevante: STAE sei esforsu realiza eleisaun prezidensiál iha Austrália 

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here