Embaxador Jepaun iha Timor Leste entrega ekipamentu protesaun pesoal ba diretor STAE iha salaun STAE, iha kaikoli Dili, kinta 17/2/2022.Imajen Tatoli/Antonio Dasiparu

DILI, 17 fevereiru 2022 (TATOLI) – Programa Dezenvolvimentu Nasaun Unida ba Dezenvolvimentu (PNUD) entrega tinta indelevel hamutuk botir 12,600 no ekipamentu protesaun pesoal ba Sekretariadu Tékniku Administrasaun Eleitorál (STAE) hodi utiliza iha eleisaun prezidensiál.

Ekipamentu hirak-ne’e entrega hosi Reprezentante UNDP Munkhtuya Alatangerel, akompaña hosi Embaxadór Japaun iha Timor-leste Masami Kinefuc. Ekipamentu hirak-ne’e simu direita Diretór Jerál STAE Alcilino Manuel Branco no akompaña hosi Prezidente CNE José Belo, iha salaun STAE, Caicoli, Dili, kinta ne’e.

Projetu PNUD CORE-TL sosa tinta indelevel botir hamutuk 12,600 liuhosi kooperasaun ho Governu Timor-Leste. Tinta ne’e hetan aprovasaun hosi órgaun administrasaun eleitorál no partidu polítiku sira liuhosi teste ne’ebé hala’o iha dezembru 2021.

Enkuantu ekipamentu protesaun pesoál ho unidade ualu ba pesoál órgaun administrasaun eleitorál hanesan dizinfetante jerigen 60, botir sanitizer 6000, mákina rega aimoruk 30, roupa ekipa protesaun pesoál hamutuk 660, maskára tipu KN95 hamutuk pakote 5,800, maskára hamutuk tahan 400,000, termometer 1,600, luvas hamutuk 2,900. Sasán hrak-ne’e hotu finansia hosi Governu Japaun.

Reprezentante UNDP, Munkhtuya Alatangerel, hateten, projetu ida-ne’e bazea ba pedidu órgaun administrasaun eleitorál sira aprezenta atu apoia Timor-Leste hodi realiza  eleisaun ne’ebé informadu, inkluzivu no rejiliente durante pandemia globál Covid-19.

“UNDP onradu tebes atu entrega ekipamentu importante ba eleisaun prezidensiál ho demokrátiku no seguru hosi Covid-19, ekipamentu sira-ne’e sosa hosi projetu PNUD CORE-TL tanba nasaun ida-ne’e foin  hala’o eleisaun sira primeira vez iha situasaun Covid nia laran,” nia ko’alia iha salaun STAE.

Projetu PNUD/UNDP CORE-TL hetan apoia hosi Governu Japaun ho osan millaun $4 no Governu Timor Leste ho $360,000.

Diretor Jerál STAE, Alcilino Manuel Branco, agradese ba apoia ne’e hodi tulun órgaun administrasaun eleitorál iha eleisaun prezidensiál.

“Atu garante eleisaun ne’e bele la’o ho susesu, ita presiza kompleta malu iha aspeitu oinoin no rekursu sira, tanba ita-nia mehi katak iha eleisaun kada períodu tenke di’ak liután, entaun ita halo serbisu hamutuk ho entidade oinoin ho maluk sira internasional atu apoia ekipamentu sira-ne’e,” nia katak.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here