Konferénsia imprensa organizaun Fitun Timor-Leste. Imajen Tatoli/Nelson de Sousa.

DILI, 17 fevereiru 2022 (TATOLI)—Portavoz Organizasaun Fitun Timor-Leste, Bernardino dos Reis Tilman, apela membru hotu iha territóriu atu hili kandidatu Prezidente Repúblika periódu 2022-2027 iha eleisaun prezidensiál ne’ebé sei realiza iha 19 marsu tinan ne’e, tuir ida-idak nia konsiénsia rasik.

Portavoz ne’e hateten, relasiona ho eleisaun prezidensiál ne’ebé mosu kandidatu timor-oan na’in-16, liu-liu ho figura lidér nasionál na’in-haat hanesan José Ramos Horta, Francisco Guterres Lú Olo, Rogeiro Tiago Lobato no Lere Anan Timur, mak Dirasaun Nasionál Organizasaun Fitun tetu ho kle’an no defisíl atu apoiu ba kandidatu ida.

“Dirasaun Nasionál Organizasaun Fitun apela ba membru hotu iha territóriu Timor-Leste hanesan autoriza membru hotu bele ba partisipa iha palku polítika hanesan sidadaun tuir konstituisaun artigu 46 alínea 1, no bele hili kandidatu prezidente periódu 2022-2027 ne’ebé mai hosi partidu polítiku ka indepedente tuir ida-idak nia konsiénsia rasik,” Protavoz Bernardino dos Reis hateten liuhosi konferénsia imprensa ba jornalista sira iha sede organizasaun Fitun, iha Bebonuk, kinta ne’e.

Tanba ne’e, nia husu membru hotu kontribui ba pás no estabilidade iha Timor-Leste atu povu bele hakmatek hodi partisipa iha eleisaun prezidensiál 2022 ho livre no responsabilidade.

Nune’e, nia apela ba membru hotu atu labele utiliza atributu organizasaun Fitun hodi apoiu ka inklina ba kandidatu Prezidente Repúblika ruma iha períodu konsolidasaun ka kampaña aberta no deklarasaun apoiu ba kandidatu prezidente ruma.

“Dirasaun Nasionál Organizasaun Fitun sei kolabora ho parte seguransa iha munisípiu 12 inklui Rejiaun Administrativa Espesiál Oé-Cusse Ambeno (RAEOA) atu vijilánsia no halo atuasaun ba aktu membru ne’ebé movimentu hodi uza atributu organizasaun Fitun iha kampaña,” nia hateten.

Se membru ruma utiliza atributu organizasaun ba partisipa iha kampaña polítika ba kandidatu prezidente nian mak Dirasaun Nasionál Organizasaun alerta ba parte seguransa no Komisaun Nasionál Eleisaun (CNE, siglá portugés) hodi atua tuir lei ne’ebé vigór.

Prezidente Organizasaun Fitun, Salvador Tilman, klarifika iha informasaun ne’ebé fó sai katak foin lalais iha membru organizasaun balun iha munisípiu balun hodi deklara ne’ebé lori mós atributu organizasaun apoiu kandidatu balun, ida-ne’e laiha kuñesimentu hosi Dirasaun Nasionál Organizasaun nian.

Organizasaun Fitun Timor-Leste, hanesan organizasaun rezisténsia ne’ebé harii hosi saudozu Armando da Silva ‘Mau Surik Murak Rai’ iha 20 abríl 1988, ne’ebé hetan rekuñesimentu hosi komandu luta, Kay Rala Xanana Gusmão, iha 20 agostu 1990.

Tuir dadus, organizasaun Fitun daudaun ne’e iha membru hamutuk 81.215 iha munisípiu 12 inklui iha Rejiaun Administrativa Espesiál Oé-Cusse Ambeno (RAEOA).

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here