Ekipa SIJK halo kremasaun ba mate-isin Chen Xian Ling iha semitériu públiku Metinaro. Imajen TATOLI/Felicidade Ximenes.

DILI, 17 fevereiru 2022 (TATOLI)—Adjuntu Prezidente Autoridade Munisípiu Dili, António Moniz Calau, hateten AMD halo hela preparasaun ba semitériu públika Matinaro hosi substitui semitériu públiku Becusse tanba iha iha fulan-marsu nia laran ne’e Governu sei autoriza komunidade bele hakoi mate iha semitériu públiku Matinaro.

“Daudaun ne’e, Munisípiu Dili halo hela preparasaun ba Semitériu Metinaro atu subtitui ita-unia semitériu Becusse ne’ebé mak agora daudaun ne’e atu nakonu. Tanba ne’e, Autoridade Munisípiu Dili halo hela koordenasaun ho instituisaun relevante sira liu-liu Prezidente IGE, I.P atu hahú servisu iha fevereiru nia laran, nune’e iha fulan marsu ita bele uza ona semitériu públiku Metinaro hodi hakoi mate,” Adjuntu Prezidente Autoridade Munisípiu Dili ne’e informa ba Agência Tatoli, iha nia knar fatin, Matadoru, Dili, kinta ne’e.

Semitériu Metinaro ne’ebé antes ne’e Governu utiliza hodi hakoi ema-ne’ebé mate ho COVID-19, nune’e iha 2020 Governu liuhosi Ministériu Administrasaun Estatál (MAE) planea ona atu utiliza semitériu foun iha Metinaro ne’e sai hanesan semitériu públiku ida hodi troka semitériu públiku Becusse ne’ebé atu nakonu ona ne’e.

Notísia Relevante: Tempu besik, Governu konstrui semitériu foun iha Metinaro

Servisu operasionál ne’ebé parte Institutu Jestaun Ekipamentu, Institutu Públiku (IGE, I.P) sei halo iha semitériu Metinaro mak sira ho sira-nia meteriál pezadu sira ba halo ateru ba fatin ne’ebé atu asesu ba fatin semitériu ne’e kle’an.

“IGE, I.P sei halo tetuk, nune’e mós sira sei kee ita-nia foho sira, nune’e bele halo tailaun hodi bele fasilita ita-nia komunidade sira bainhira ba hakoi mate. Daudaun ne’e ita esforsu másimu pelumenus iha fevereiru nia rohan, inisíu fulan marsu ne’e bele iha ona mudansa balun iha Metinaro. Nune’e, ita bele fó ona informasaun ba ita-nia komunidade iha munisípiu Dili, karik balun nia familia mate bele ba hakoi ona mate iha semitériu públiku Metinaro,” nia dehan.

Orsamentu operasionál ba konstrui semitériu públiku Metinaro ne’e, Autoridade Munisípiu Dili (AMD) prevee kuaze rihun $20, hodi fasilita IGE, I.P nia servisu iha terrenu.

Notísia Relevante: Governu sei halo pagamentu ba rai-na’in semitériu foun Metinaro

Jornalista  : Nelia Fernandes

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here