Komandante Jerál PNTL, Komisáriu Faustino da Costa. Imajen TATOLI/Egas Cristóvão

DILI, 17 fevereiru 2022 (TATOLI)—Komandante Jerál Polísia Nasionál Timor-Leste (PNTL), Komisáriu Faustino da Costa, husu joven timor-oan atu kria páz no estabilidade iha ámbitu eleisaun prezidensiál 2022, ne’ebé hahú hosi prosesu kampaña to’o eleisaun ba Prezidente Repúblika períodu 2022-2027 ne’ebé sei realiza iha 19 marsu.

“Besik kampaña ba eleisaun tau ita boot sira-nia an hodi kria pás no estabilidade, la’ós sai joven ne’ebé ema ruma atu aproveita ita boot sira ida-ne’e importante,” Komisáriu Faustino hato’o apela ne’e ba jornalista sira hafoin ramata sorumutu ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pite, kinta ne’e.

Iha semana hirak liu-bá mosu konfrontasaun iha Maslidun, Tasi-Tolu entre grupu arte marsiál Kera Sakti ho arte rituál 77 no polísia halo kedas atuasaun hodi identifika suspeitu sira, hafoin ne’e mós lidér hosi organizasaun rua ne’e hala’o kedas deklarasaun asinatura konjuntu hodi alerta kontrola membru sira bevita konflitu kontribui pás no estabilidade.

Aliénde akontese mós kazu omesídiu hosi ema deskuiñesidu hamate ka sona mate António de Jesus, iha área Elemloi, aldeia Delta 3, suku Comoro, postu administrativu Don Aleixo, munisípiu Dili, iha 07 fevereiru 2022, tuku 03h00 madrugada, to’o ahora prosesu identifikasaun autór ba kazu omesídiu ne’e seida’uk divulga sai tanba iha prosesu nia laran hela.

Parte seluk, Faustino da Costa, fó hanoin katak joven mak sai hanesan futuru ba nasaun, nune’e husu iha tempu ohin loron oinsá buka aproveita tempu hodi prepara an sai futuru ema ne’ebé mak di’ak.

“Oinsa joven atu sai erói aban bainrua ba dezenvolvimentu nasionál mak prepara ita boot sira-nia an bele halo atividade ne’ebé kontribui no la’ós atividade sira-ne’ebé tenke hetan hosi ema seluk maibé hahú hosi família no bairru, aldeia ho suku,” nia dehan.

Jornalista : Nelson de Sousa

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here