Kondisaun ponte Dilor iha postu Lacluta, Viqueque ne’ebé kotu. Imajen/Espesiál

DILI, 17 fevereiru 2022 (TATOLI)–Prezidente Institutu Jestaun Ekipamentu, Instititu Públiku (IGE, I.P) Hermenegilda da Costa Laurentina, informa, semana oin ekipa sei mobiliza ekipamentu hodi halo normalizasaun ba  ponte Dilór ne’ebé kotu, iha postu Lacluta, munisípiu Viqueque.

“Ha’u hakarak informa katak ekipa IGE sei  ba normaliza ponte Dilor iha semana oin,  maibé sei haree kondisaun bele halo normalizasaun ka lae, tanba sei haree ba volume bee,” Prezidente Konsellu Administrasaun IGE, I.P hateten ba Agência TATOLI, iha ninia kanaar fatin, kinta ne’e.

Notisia relevante: Autoridade Lacluta husu Governu normaliza ponte Dilor no Welolo

Tuir dirijente institutu ne’e, antes ne’e iha ona planu atu normaliza infraestrutura ne’e, maibé kondisaun bee mota boot to’o horiseik lorokraik.

“Entaun IGE labele halo aterru, presiza haree kondisaun volume bee tun ona maka halo normalizasaun. Bainhira bee boot mak ita obriga aterru, ita gasta tempu no osan hodi sobu fali,” nia akresenta.

Aleinde ne’e, Prezidente Konsellu Administrasaun IGE, I.P refere ba ponte Welolo, ne’ebé ekipa halo serbisu desde dezembru 2021 maibé seidauk remata tanba liga ba orsamentu, maibé tempu badak sei kontinua.

Iha fatin ketak, Diretór servisu Ministériu Obras Públika iha munisípiu Viqueque, Mário do Rego, hateten, to’o agora seidauk iha konkursu ruma hodi haree kondisaun ponte ne’e.

“Daudaun ne’e, ita-nia empreza Ceramor maka halo hela konstrusaun morru iha ponte Dilor nian, maibé sira la halo normalizasaun ponte,” nia akresenta. 

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here