Prezidente Konsellu Administrasaun APORTIL, Lamartino de Oliveira. Imajen TATOLI/Francisco Sony

DILI, 17 fevereiru 2022 (TATOLI)–Prezidente Konsellu Administrasaun Autoridade Portuáriu Timor-Leste (APORTIL), Lamartino de Oliveira, komprometidu sei solusiona konetividade via marítima ho rota Dili-Ataúro.

“Ró Berlin Nakroma seidauk di’ak, entaun ró bá Ataúro laiha, agora uza de’it kapal cepat maibé ró ne’e la merese atu uza ba tasi laran, iha ema-nia rain uza ba lagoa sira, maibé agora ita-nia kondisaun mak nune’e. Ami sei buka solusaun ba ida-ne’e,” Prezidente Konsellu Administrasaun APORTIL hateten ba Agência TATOLI, via telefónika, kinta ne’e.

Notísia relevante: Fatin atraka kiik, ró-ahi Berlin-Ramelau seidauk bele viajen bá Ataúro

Nune’e, Lamartino de Oliveira sei koordena asuntu ne’e ho ekipa tanba nia foin mak simu knaar.

“Ami estuda hela buat ne’e hodi atende nesesidade povu, entaun daudaun ne’e ami diskute hela, halo nusa mak bele atende lalais populasaun Ataúro, provizóriamente ró privadu sira mak atende hela hanesan kapal cepat, maibé tuir loloos labele tama ba tasi, maibé foin dahuluk ita Timór mak ba tasi, tuir organizasaun marítima internasionál kontradis ho lei marítima internasionál, maibé laiha buat ida atende lai,” nia akresenta.

Aleinde ne’e, APORTIL atu buka dalan halo manutensaun ba ró-ahi Berlin Nakroma.

“Ami esforsu lori ró ne’e ba halo manutensaun iha Surabaya, maibé problema mak Konsellu Administrasaun sesante la tau orsamentu ba menutensaun, entaun oinsá atu halo manutensaun, ami sei koordena malu hodi oinsá bele buka solusaun. Nakroma seidauk bele deside halo manutensaun maski iha ona empreza ne’ebé mak manán. Iha orsamentu tinan 2022 maibé la sufisiente,” nia subliña.

Daudaun ne’e, ró-ahi Berlin-Ramelau mak halo hela operasaun entre Dili-Oé-cusse, maibé labele ba Ataúro tanba ponte kais la sufisiente (kiik), nune’e ró ne’e labele atraka.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here