Reitór UNTL, João Soares Martins. Imajen Tatoli/Egas Cristóvão.

DILI, 16 fevereiru 2022 (TATOLI)—Univeridade Nasionál Timor Lorosa’e (UNTL) ho Forum Komunikasaun Valór Nasaun (FKOVANA), iha 24 fevereiru ne’e, sei realiza semináriu ho tema sentrál “Reflesaun Nasionál ho Espiritu Rekonsiliasaun” ne’ebé sei konvida lidér nasionál sira hodi fó sira-nia perspetiva.

Iha kuarta (16/02/2022) ne’e, Reitór UNTL, João Soares Martins ho ekipa hala’o audiénsia ho Prezidente Repúblika, Francisco Guterres Lú Olo, hodi konvida Xefe Estadu atu partisipa no halo abertura ba semináriu refere.

“Ohin hetan biban hodi hasoru malu ho Prezidente Repúblika atu konvida exelénsia halo abertura ba semináriu ne’ebé mak UNTL ho Forum Komunikasaun organiza hamutuk hodi realiza iha 24 fevereiru no Prezidente Repúblika disponível ona,” Reitór UNTL ne’e hateten ba jornalista sira hafoin ramata sorumutu ho Xefe Estadu iha Palásiu Prezidensiál Nicolau Lobato, Bairu Pite, Dili, kuarta ne’e.

Semináriu ne’e hala’o tanba nasaun Timor-Leste hasoru situasaun krítiku nomós atu tanba sei hasoru eleisaun prezidensiál ne’ebé sei realiza iha 19 marsu 2022 ne’ebé sei hamosu tensaun polítika ne’ebé aas.

Atu hamenus tensaun polítika sira-ne’e, hosi parte UNTL no FKOVANA konvida lidér polítiku sira liu-liu lidér nasionál hanesan Prezidente Repúblika, Francisco Guterres Lú Olo, Mari Alkatiri, Kayrala Xanana Gusmão, José Ramos Horta, Rogerio Lobato ho líder sira seluk tán.

Reitór UNTL ne’e hateten, lidér nasionál envolve iha tempu rezisténsia to’o indepedénsia maibé daudaun ne’e sira ladún hamutuk, nune’e semináriu ne’e tenta antes ba eleisaun prezidensiál 2022 ne’e, líder sira-ne’e fahe netik opiniaun no tuur hamutuk hodi realiza eleisaun ne’e ho di’ak no susesu.

Maibé, tuir nia, la’ós de’it atu kuda valór rekonsiliasaun ba iha sosiedade ne’e importante tebes, tanba nasaun hasoru liu ona situasaun krítiku iha invazaun, lidér nasionál sira konsege mai hamutuk hodi manan ukun rasik an, nune’e laiha tán razaun atu la hamutuk hodi dezenvolve nasaun ne’e iha loron aban.

Hanesan sidadaun ida, nia husu atu respeita malu bainhira iha kampaña eleitórál mosu karik ho síviku no redús insulta malu, no di’akliu aprezenta programa atu dezenvolve nasaun, ida-ne’e mak importante liu.

Prezidente Konsellu Ezekutivu Forum Komunikasaun Valór Nasaun (FKOVANA), Eladio Faculto, hateten nasaun presiza lidér nasionál sira fila oin ba malu hodi ko’alia tanba
sira-nia obra ba luta iha tinan barak hodi hetan ukun-an.

Tan ne’e, ho UNTL tenta promove halo reflesaun nasionál kona-ba situasaun polítika no ambiente komunikasaun iha Timor-Leste oinsá mak di’ak fali, no rekonsiliasaun hanesan parte importante oinsá lidér sira bele ko’alia ba malu no ba povu katak presiza fila oin ba malu mezmu diverzenjia polítika, ida-ne’e mak fundamentál.

Jornalista  : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here