Reitór UNPAZ, Adolmano Amaral, Imajen TATOLI/António Gonçalves

DILI, 16 fevereiru 2022 (TATOLI)–Reitór Universidade da Paz (UNPAZ), Adolmando Amaral, hateten, tinan ne’e sei halo konstrusaun edifísiu foun iha resintu kampus iha Osindo 1 Manleuana.

“Universidade sei apoiu edifísiu foun ho andar tolu ba antigu alunu sira tanba agora sira iha ona asosiasaun ida, ne’ebé sempre halo serbisu maka’as buka apoiu ba universidade. Pur enkuantu, daudaun kuandu edifísiu foun ne’e ramata, ita sei uza lai maibé kuandu iha futuru mai fasilidade universidade kompleta hotu ona mak ita sei entrega ba antigu alunu sira atu uza hodi halo serbisu,” Reitór informa Agência TATOLI, iha kampus UNPAZ, Osindo 1 Manleuana, kuarta ne’e.

Notísia relevante: MESSK no BNCTL assina akordu Liña Kréditu” Ensinu Superior Kualidade+”

Tuir Reitór, orsamentu ba konstrusaun sei kréditu iha Banku Nasionál Komérsiu Timor-Leste (BNCTL, sigla portugés).

“Ita-nia proposta kréditu husu $500.000, maibé planta no Bill of Quantity (BoQ) ne’ebé enjeñeiru sira prepara sa’e ba $700.000. Maibé laiha buat ida, osan $200.000 universidade mak sei responsabiliza no sei husu tan apoiu hosi ministériu,” nia akresenta.

Proposta kréditu UNPAZ submete ona ba banku, maibé iha dokumentu balun mak tenke kompleta.

“Banku haruka halo dokumentu formál kona-ba riku-soin universidade hanesan rai, karreta inklui dokumentu komprovativu no sertifikadu sira, tanba antes ne’e hakerek de’it dehan iha maibé la aprezenta,” nia akresenta.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here