Prezidente Tribunál Rekursu, Deolindo dos Santos. Imajen Tatoli /Francisco Sony

DILI, 16 fevereiru 2022 (TATOLI)- Tribunál Rekursu ofiasialmete lansa formuláriu liuhosi sistema plataforma online ba deklarasaun rendimentu bens no interese tuir  lei 7/2020, 26 agostu kona-ba Medida Prevensaun no Kombate Korrupsaun (MPCC, sigla portugés) iha kapitulu II Rejime Deklarasaun Rendimentu, Bens no Interese hosi artigu 27 to’o 58.

Biban ne’e, Prezidente Tribunál Rekursu (PTR), Deolindo dos Santos, hateten lansamentu ba formuláriu online ba deklarasaun rendimentu, bens no interese atu fasilita órgaun soberanu sira bele aprezenta riku-soin ba Tribunál Rekursu.

Notísia relevante: 2022, titulár órgaun soberanu no kargu xefia iha obrigasaun deklara riku-soin

“Hahú ohin, ita nian orgaun tilulár sira hanesan Prezidente Republika, Prezidente Parlamentu Nasionál ho nia Vise Prezidente sira, Deputadu sira, Primeiru Ministru  ho nia membru Governu sira, Komisáriu Komisaun  Anti Korrupsaun tuir lei haruka, bele  aprezenta ona riku-soin, liuhosi formuláriu ho meiu online ne’ebé ita ohin lansa ona ne’e,” Prezidente Tribunál Rekursu ne’e hateten liuhosi intervensaun ámbitu lansamentu formulariu online deklarasaun rendimentu, bens no interese iha Caicoli, kuarta ne’e.

Nia dehan tékniku Tribunál Rekursu mak sei fasilita hodi esplika maneira uza sistema online atu prenxe formulariu ba deklarante ne’ebé atu aprezenta nia riku-soin hanesan naran kompletu, estadu sivíl, ona na’in-hira no seluk tan.

“Ita nian orgaun titulár sira ne’e, ami nia tékniku sei komunika hodi esplika ba sira oinsá uza meus hodi prenxe formulariu ne’e, liuliu sira nia email tenke mai hotu ona iha Tribunal Rekursu, no sira ida-idak mós sei hetan password atu enxe formuláriu ne’e idak idak nian no data ba aprezentasaun riku-soin ba titulár oagaun soberanu sira hahú, ohin ita lansa formuláriu online ne’e to’o 16 marsu tinan ne’e,” nia akresenta.

Sistema Plataforma online ka formuláriu online deklarasaun rendimentu, bens no interese ne’e instala Agência Teknolojia Informasaun no Komunikasaun Insititutu Públiku (TIC-Timor, I.P).

Tanba, Bazeia ba artigu 6 iha Lei 7/2007, 25 jullu kona-ba estatutu titulár soberania, katak lidensa órgaun soberanu sira tenke deklara nia riku-soin no família nian ba Tribunál Rekursu.

Enkuantu, tuir Lei númeru 7/2020, 26 agostu kona-ba Medida Prevensaun no Kombate Korrupsaun (MPCC, sigla portugés) iha kapitulu II Rejime Deklarasaun Rendimentu, Bens no Interese hosi artigu 27 to’o 58.

Nune’e, Lei MPKK define ona iha artigu 48 to’o artigu 53, katak ema ne’ebé simu ona pose tuir lei atu asume kargu xefia iha obrigasaun deklara riku-soin dentru 30 nia-laran, liu ida ne’e hetan sansaun ho koema 25% to’o 30%.

Komisaun Anti Korrupsaun (CAC), mós hahú serbisu hamutuk ho TIC-Timor prepara ona formatu ba deklasaun riku-soin ne’ebé kuaje atinje 99%.

Daudaun ne’e, CAC liuhosi Diresaun Prevensaun no Sensibilizasaun, simu ona lista funsionáriu ho kargu Xefia hosi insitituisaun estadu hamutuk 100 ho deklarante ema na’in-5.774 mak sujeita  atu deklara riku-soin no bens interese iha 2022.

Notísia Relevante: Instituisaun Estadu 100 deklara riku-soin ba CAC iha 2022

Jornalista : Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here