Ró Haksolok. Imajen/Dok. ZEESM

DILI, 16 fevereiru 2022 (TATOLI)— Prezidente Tribunál Rekursu (PTR) nu’udar mós Prezidente Tribunál Kámara Konta, Deolindo dos Santos, informa iha tinan ne’e,   Tribunál Kámara Kontas (CdC, sigla portugés), hahú hala’o auditória ba Ró Haksolok ne’ebé durante ne’e sai polémika iha públiku.

“Iha tinan ne’e, Kámara Konta hala’o auditória foun ba Zona Espesiál Ekonomia Sosiál no Merkadu (ZEESM), ita ko’alia kona-bá ZEESM ne’e buat hotu iha laran, ita labele fahe ba  ketak ketak tanba inklui ona ho auditória ba  Ró Haksolok,” PTR Deolindo ne’e  hateten ba jornalista sira hafoin lansa formuláriu online deklarasaun rendimentu, bens no interese, iha edifísiu  Tribunál Rekursu-Caicoli, kuarta ne’e.

Notísia Relevante: PN aprova millaun $127 ba RAEOA inklui millaun $14 finaliza Ró Haksolok

Prezidente Tribunál Rekursu, Deolindo dos Santos. Imajen Tatoli /Francisco Sony

Alende ne’e, Deolindo dos Santos, afirma iha tinan ne’e,  Kámara Konta  hala’o mós auditória ba Fundu COVID-19, Subsídiu Cesta Bazika ne’ebé dadudaun la’o hela, hala’o mós auditória ba obra Estrada sira ne’ebé halo ho fundu impréstimu hanesan, Banku Dezemvolvimentu Aziátiku  no  Banku Mundiál no hala’o  auditória ba Parlamentu Nasionál.

“Auditória sira ne’ebé que la’o ne’e espera katak antes tinan ikus ida ne’e,  buat sira ne’ebé ita halo ne’e ita bele aprova,” Deolindo dos Sanots espera.

Garante Ró Haksolok sei mai

Prezidente Rejiaun Administrativa Espesiál Oe-Cusse Ambeno (RAEOA), Arsénio Paoxão Bano, garante Ró Haksolok sei mai iha Timor-Leste tanba daudaun ne’e nia prosesu la’o hela.

Prezidente Autoridade RAEOA, Arsénio Paixão Bano. Imajen Tatoli/Francisco Sony

“Ró Hakslok ne’e ita agora halo rekuperasaun estaleiru ho ró ne’e rasik tanba ne’e mak servisu la’o dada’uk bele hadi’a ró ne’ebé iha fulan tolu hahú janeiru rekupera estaleiru hafoin ne’e hadi’a ró nune’e garante sei mai,” Prezidente RAEOA hateten.

Ró Haksolok ne’e uluk Governu anteriór ne’e eis Ministru Pedro Lay mak asina kontratu ne’ebé ezekuta projetu mak primeiru Prezidente RAEOA nia ezekusaun to’o 80%, maibé iha problema krize ekonomia iha Portugal, mudansa lideransa autoridade RAEOA no situasaun COVID-19 .

Arsénio Paixão Bano hateten, hanesan Prezidente Autoridade RAEOA foun Estadu investe ona 80% ba ró Hakslok nune’e iha obrigasaun atu halo hotu servis, tanba ida-ne’e mak responsavilidade atu halo hotu ho apoiu Governu sentrál nian.

Alkatiri entrega ba Prezidente RAEOA

Entretantu, Eis Prezidente Autoridade Rejiaun Administrativa Espesiál Oé-cusse-Ambeno (RAEOA), Marí Alkatiri, hateten, nia parte lakohi ona ko’alia kona-ba ró ferry Haksolok tanba entrega ona asuntu ne’e ba atuál Prezidente Autoridade RAEOA, Arsénio Paixão Bano.

Sekertáriu Jerál Partidu FRETILIN, Mari Alkatiri. Imajen TATOLI/Francisco Sony

“Ha’u bá Portugal halo vizita família, ha’u la bá halo serbisu ofisiál ruma. Ha’u nein dala-ida to’o iha fatin ne’e (estaleiru ró), tanba ha’u hatene ema hafuhu barak. Ha’u evita tanba agora Prezidente Autoridade la’ós ona ha’u ona, ha’u-nia gabinete eis titulár besik edifísiu ZEEMS, maibé ha’u nein tau ain iha sorin, tanba sai ona, ha’u kontente tebes tanba haree Prezidente Autoridade esplika ró Haksolok ho konvisaun no loloos,” Mari Alkatiri, relata.

Prosesu konstrusaun ró Haksolok

Ró Haksolok inaugura iha loron 26 maiu 2017 iha sidade Figuerra da Foz, Portugal no tuir informasaun sei to’o iha outubru 2017, maibé tanba problema internál empreza ho sub-kontratór maka to’o agora ró seidauk to’o Timor-Leste.

Ró Haksolok ho kustu millaun €13,7, iha kapasidade atu tula ema na’in-377 no karreta hamutuk 15.

Enkuantu, prosesu konstrusaun ba ró, ninia kontratu asina iha 2014 entre Governu no empreza portugés no kontrusaun konsege paradu, maibé bainhira estabelese ZEESM, prosesu konstrusaun ró-ahi ne’e entrega ba autoridade RAEOA maka responsabiliza.

Desizaun atu hili ninia estaleiru, hosi V Governu Konstitusionál, ne’ebé selebra kontratu ho estaleiru Atlantic Eagle ship Building, Lda iha loron 22 setembru 2014.

RAEOA-ZEESM simu prosesu konstrusaun ró liuhosi transferénsia projetu no alokasaun orsamentu husi Governu sentrál ba autoridade hodi transfere podér no alokasaun verba ne’ebé akontese entre Governu no Estaleiru Atlantic Eagle ship Building.

Atu garante implementasaun tuir espesifikasaun no padraun tékniku ba ferry ró Haksolok no asegura katak bele hetan rejistu internasionál tuir rekezitu Governu Timor-Leste, maka RAEOA-ZEESM selebra kontratu supervizaun ba konstrusaun ferry ho instituto soldadura e Qualidade (ISQ) ne’ebé hanesan instituisaun ho esperiénsia liu tinan 50 ho konstrusaun ne’ebé kredensiál atu fiskaliza konstrusaun.

Notísia relevante: PN sei kria ekipa fiskaliza Ró Haksolok

Jornalista : Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here