Xefe Estadu Maior F-FDTL, Tenente Jenerál Falur Rate Laek. Imajen Tatoli /Egas Cristovão.

DILI, 16 fevereiru 2022 (TATOLI)—Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Falur Rate Laek, kuarta ne’e hala’o sorumutu dahuluk hafoin simu pose ho Prezidente Repúblika, Francisco Guterres Lú Olo, hodi ko’alia kona-ba faze tranzisaun komandu ne’ebé la’o ona.

Notísia Relevante: PR fó pose ba Coliati-Klamar Fuik asume vise Xefe Estadu forsa armada

“Asuntu prinsipál ko’alia kona-ba faze tranzisaun komandu hanensan ita hatene horisehik mak Vise Xefe Maiór Jenerál ho Xefe Estadu Maiór Forsa Armada simu pose. Hafoin halo mudansa, preparativu komandu halo diretivu inisiál sira ba atividade no programa saida mak atu halo,” Tenente Jenerál Falur Rate Laek hateten ba jornalista sira hafoin ramata sorumutu ho Xefe Estadu, iha Palásiu Prezidensiál Nicolau Lobato, Bairu Pite, Dili, kuarta ne’e.

Planu no programa ne’ebé atu implementa mak prevee tiha ona liu hosi Orsamentu Jerál Estadu (OJE) 2022, tan ne’e sorumutu ne’e Tenente Jenerál fó situasaun atuál F-FDTL nian ba iha Prezidente Repúblika nu’udar komandante supremu forsa armada nian.

Durante sorumutu, PR Lú-Olo hato’o mensajen ba membru F-FDTL hotu atu mantein dixiplina operasionál no mantein prontidaun.

Enkuantu, iha loron 13 dezembru 2021, Deputadu sira iha Parlamentu Nasionál liuhosi diskusaun espesialidade ba proposta lei Orsamentu Jerál Estadu (OJE) 2022, aprova millaun $25,527,233 ba FALINTIL-Forsa Defeza Timor-Leste (F-FDTL) ho rezultadu votasaun a-favór 52, kontra 0 no abstensaun 12.

Orsamentu ba tinan 2022 ne’e, aloka ba saláriu vensimentu $10,756,000, bens servisu $14,771,233, kapitál menór, kapitál dezenvolvimentu no transferénsia públika laiha, no hosi orsamentu ne’e sei finasia ba programa tolu, sub-programa lima no atividade 11.

Programa defeza nasionál prevee $22,930,372, programa boa-governasaun no jestaun instituisionál prevee $2,566,861 no programa igualidade jéneru no inkluzaun sosiál prevee  $30,000.

Programa defeza nasionál ho nia sub-programa defeza militár nia atividade mak garante misaun operasionál F-FDTL, moderniza infraestrura no ekipamentu militár.

Sub-programa rekursu umanu ba prestasaun servisu ho nia atividade jestaun rekursu umanu  ba prestaun servisu.

Ba programa boa-governasaun no jestaun instituisionál ho nia sub-programa rua no atividade haat.

Entretantu, programa igualidade jéneru no inkluzasaun sosiál ho nia sub-programa implementasaun NAP-rezolusaun 1325 (2000) ONU kona-bá WPS ho nia atividade estabelese unidade jéneru, aspeitu integradu jéneru iha kuríkulu, promove lideransa no kapasidade feto iha F-FDTL, sensibilizasaun motiva feto iha militár no implementasaun abordajen integradu igualidade jéneru.

Jornalista : Nelson de Sousa

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here