Vise Ministru MNEK, Julião da Silva. Imajen Tatoli/Egas Cristovão

DILI, 16 fevereiru 2022 (TATOLI) – Governu liuhosi Ministériu Negósiu Estranjeiru no Kooperasaun (MNEK) sei haruka nota diplomasia ba nasaun haat nune’e Timor-oan sira iha diáspora bele ezerse direitu vota iha eleisaun prezidensiál períodu 2022-2027.

Vise-Ministru Negósiu Estranjeiru no Kooperasaun, Julião da Silva, informa MNEK sei hala’o enkontru interna hodi hakerek intensaun governu nian liuhosi diresaun nasionál asuntu bilaterál kona-ba nota diplomasia ba nasaun haat ne’e.

Nasaun haat ne’ebé MNEK sei haruka karta mak hanesan Austrália, Portugál, Korea Súl no Reinu Unidu.

“Ita sei halo mós nota diplomasia manda ba governu Austrália hodi hatene regra, rekizitu ne’ebé aplika iha-ne’ebá,” Vise MNEK hateten iha Palásiu Governu, kuarta ne’e.

Intensaun hosi karta diplomasia mak husu autorizasaun inklui buka hatene rekizitu kona-ba lala’ok eleisaun iha diáspora, karta refere sei manda liuhosi embaxada sira iha Timor-Leste atu oinsá disponivel ba sidadaun timor-oan atu tuir eleisaun prezidensiál.

STAE esforsu realiza eleisaun iha Australia

Diretór Jerál STAE, Acilino Manuel Branco. Imajen TATOLI/António ‘Dasiparu’ Gonçalves.

Iha parte seluk, Sekretariadu Tékniku Administrasaun Eleitorál (STAE), sei esforsu atu realiza eleisaun prezidensiál iha Austrália nune’e sidadaun sira iha diaspora labele lakon direitu ba vota iha eleisaun prezidensiál.

“Ita-nia preparasaun kontinua la’o, mesmu iha tinan kotuk prosesu ita la halo atualizasaun, maibé baze de dadus ba eleitór hosi Austrália nian kontinua eziste ita-nia baze dadus sentrál. Ita sei halo esforsu tomak nune’e ita-nia maluk sira labele lakon sira-nia direitu iha eleisaun prezidensiál,” Diretór Jerál STAE, Acilino Manuel Branco, ko’alia Caicoli, kuarta ne’e.

Nune’e STAE kontinua prepara no halo koordenasaun hamutuk ho Ministériu Negosiu Estranjeiru no Kooperasaun (MNEK), liuhosi diresaun Jerál embaixada no konsuladu sira.

“Ami mós kontakta direita ho  ita-nia  embaixadór no konsuladu sira iha nasaun ne’ebé atu organiza eleisaun, liuliu Austrália hodi fornese informasaun relevante hodi ajusta ita-nia planu sira,” nia dehan.

“Ba nasaun seluk laiha problema,  iha Australia rasik mós ita-haree progresu ne’ebè di’ak, iha nivél tékniku ita kontinua halo preparasaun sentru votasaun bainbain nian, hein-de’it tempu deslokasaun,” nia katak.

STAE estabelese ona sentru votasaun sia (9) iha diáspora ne’e sei estabelese tolu iha Austrália mak ida iha Darwin, Sidney no Melbourne, depois ida monta iha Korea Súl no sentru votasaun rua monta iha Portugál no tolu (3) seluk monta iha Londres, Peterborough no Oxford.

Dadus resensiamentu eleitorál ba eleitór sira iha diáspora mak hanesan Austrália 1.489, Korea Súl 1.262, Irlandia 1.251, Portugál 762 no Reinu Unidu hamutuk 2.236.

Dadus provizóriu resensiamentu eleitorál no atualizasaun baze de dadus to’o novembru 2021 eleitór hamutuk 857.487 ne’ebé kompostu hosi Munisípiu Aileu 33.727, Ainaro 44.571, Baucau 95.142, Bobonaro iha 69,822.

Nune’e mós Covalima 47.935, Dili 190.750, Ermera 82.931, Lautém 48.297, Liquiça 50.965, Manatuto 35.422, Manufahi 40.308, Rejiaun Administrativa Espesiál Oé-Cusse Ambeno (RAEOA) 51.005 no munisípiu Viqueque hamutuk 59.612.

Jornalista    : Natalino Belo/Celestina Teles

Editór          : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here