Ministru Edukasaun, Juventude no Desportu, Armindo Maia. Imajen TATOLI/Francisco Sony

DILI, 16 fevereiru 2022 (TATOLI)–Ministru Edukasaun Juventude no Desportu (MEJD), Armindo Maia, apoiu desizaun Eskola Ensinu Báziku Sentrál (EBC, sigla portugés) Maria Auxiliadora, Comoro, suspende atividade aula prezensiál tanba alunu, profesór no madre balun hetan sintoma mear, isin manas, inus metin no moras dengue.

Tuir Minitru, tanba agora Prezidente Repúblika la dekreta ona situasaun Estadu Emerjénsia, maka filafali ba desizaun eskola ida-idak atu kontinua trata kondisaun seguru ba estudante sira.

“Ha’u hanoin desizaun Eskola Maria Auxiliadora suspende atividade ensinu aprendizajen estudante sira ne’e di’ak tebes hodi prevene no asegura labarik sira hosi moras hada’et,” Ministru dehan iha Palásiu Governu, kuarta ne’e.

Governante ne’e konsidera, eskola tenke iha polítika rasik atu proteje labarik sira bainhira enfrenta problema ho moras hada’et sira, tanba agora daudaun MEJD laiha ona kompeténsia atu suspende atividade iha kada eskola sira tanba Estadu Emerjénsia laiha ona.

Notísia relevante: PR promulga alterasaun Lei Sistema Saúde, Estadu la prezisa implementa EE

“Husu ba parte eskola, bainhira aula hahú filafali tenke orienta uza máskara, fase liman ho sabaun inklui halo distánsia fízika,” nia akresenta.

Iha parte seluk, Jornalista Agência TATOLI tenta konfirma ho Dirijente Eskola Maria Auxiliadora, maibé la konsege tanba portaun eskola taka metin, maibé bazeia ba avizu ne’ebé taka iha portaun katak eskola suspende atividade aprendizajen durante semana ida.

Razaun eskola suspende atividade eskola tanba bazeia ba kondisaun alunu, profesór no madre balun moras, nune’e atu prevene moras la bele hada’et ba malu, parte eskola foti desizaun iha semana ne’e nia laran laiha atividade aula prezensiál no hotu-hotu deskansa iha uma hodi rekupera fali saúde.

“Husu ba alunu sira hotu, hahú loron 16 to’o 22 fevereiru bele estuda iha uma, ba estudante sira hosi edukasaun pre-eskolár no ensinu báziku siklu 1,2,3 sei kontinua fali aula prezensiál iha loron 22 fevereiru 2022,” refere avizu hosi Eskola Maria Auxiliadora.

Jornalista : Tomé Amado

 Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here