iklan

DEFEZA, DILI, HEADLINE

MD sei rekruta membru F-FDTL foun na’in-600 iha abríl 2022

MD sei rekruta membru F-FDTL foun na’in-600 iha abríl 2022

Ofisiais FALINTIL Forsa Defeza Timor Leste (F-FDTL). Imajen/Tatoli.

DILI, 16 fevereiru 2022 (TATOLI)—Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Falur Rate Laek informa, Ministériu Defeza (MD) lideradu hosi Filomeno Paixão de Jesus,  sei loké tan rekrutamentu ba membru F-FDTL foun hamutuk na’in-600 iha fulan abríl tinan 2022.

Tenente Jenerál Falur Rate Laek. Imajen Tatoli /Egas Cristovão

“Agora prepara atu halo daudaun ida ne’e se bele ita sei realiza rekrutamentu iha fulan abríl agora,” Tenente Jenerál Falur Rate Laek, hateten ba jornalista sira hafoin ramata enkontru ho Prezidente Repúblika, Francisco Guterres Lú Olo, iha edifísiu Palásiu Prezidensiál Nicolau Lobato, Bairu Pite, Dili, kuarta ne’e.

Rekrutamentu ne’e sei fó prioridade ba sidadaun joven timor-oan hotu ne’ebé nia bele kumpre rekezitu ka kondisaun sira-ne’ebé define tiha ona ba vaga rekrutamentu, tanba ne’e nia husu joven hotu atu prepara fizíku ho saúde di’ak hodi bele konkore.

Hatán kona-ba komandu sei fó prioridade ba joven sira ne’ebé foin lalais tuir ona teste maibé la pasa no iha rekrutamentu mai ne’e sei fó prioridade ba sira no juventude sira seluk mós.

Enkuantu, iha Orsamentu Jerál Estadu (OJE) 2022 komandu prevee ona ba rekrutamentu refere.

OJE 2022: MD sei rekruta membru F-FDTL 600

Antes ne’e, Ministériu Defeza (MD) lideradu hosi Filomeno Paixão de Jesus, prevee ona iha Orsamentu Jerál Estadu (OJE) 2022 hodi rekruta tan membru FALINTIL-Forsa Defeza Timor-Leste (F-FDTL) foun hamutuk na’in-600.

“Prioridade ba tinan oin, Governu aseita ona sei halo tan rekrutamentu ba membru F-FDTL 600,” Ministru Defeza, Filomeno Paixão de Jesus, hateten ba jornalista sira hafoin hala’o audiénsia públika ho komisaun C Parlamentu Nasionál, iha PN, kinta (18 novembru 2021).

Governante ne’e hatutan, aleinde ne’e mós Ministériu Defeza sei sosa mós ekipamentu militár hanesan farda, kilat no kilat-musan ba membru F-FDTL foun sira.

Tuir dokumentu livru 2 planu asaun anuál OJE 2022, Ministériu Defeza prioritiza programa ho kódiku 388 kona-ba Defeza Nasionál ho nia sub-programa formasaun no dezenvolvimentu rekursu umanu iha área defeza no seguransa ho nia atividade mak halo rekrutamentu militár no funsionáriu Ministéiru Defeza, ne’ebé ho alokasaun orsamentu iha verba saláriu vensimentu no bens servisu ho totál $650,127.

Antes ne’e, iha loron 27 setembru 2021, membru foun F-FDTL na’in-600 inkorpora ona ba Komponente Formasaun no Treinu Metinaro, hodi submete ba formasaun militár durante fulan neen atu bele hala’o knaar iha instituisaun defeza ne’e.

Membru hirak ne’e hosi rezultadu prosesu naruk hahú ho submisaun dokumentu, teste fizíku no saúde ba joven timor-oan iha territóriu ne’ebé selesionadu hodi sai membru foun ba FALINTIL-F-FDTL.

Jornalista : Nelson de Sousa

Editór      : Cancio Ximenes

iklan
iklan

3 Comments

  1. Atan hau hanesan sidadaun Timor oan ida….

    W hakarak atu sai lutu hodi servi ba hau rai doben Timor lorosae nee
    W hakarak atu sai atan NO SAI ATAN BA Hau MAUN ALIN husi Rai ikun to Rai ulun.husi tasi feto to tasi mane hamutuk

    No sei halo tuir prinsipiu hotu nebe mak hakerek ona iha lei contituisaun RDTL

  2. Bom dia e bom saude ba comandante sra htu mak hau respeita………

    Atan hau hakarak duni atu sai atan ba hau nia nasaun rasik………
    Ble fo tempo mai hau atu nunee hau bele preprara an no ba prense formulario nee
    Hau nia aman ema neebae mak politiko ida.. Nia terus hotu iha funu laran.
    No nia agora moras hela iha uma hahu iha tinan ruanulu resin ida ba kotuk iha 2000 to agora nia seduuk diak nmos seidauk halo tratamento surat ba veteranos nian……

    W husu comandante sira atu hare fila fali ba ida. Neee
    Laos dehan ami nia regime special laiha tamba hau nia apa neee uluk faan timor leste laee..

    Desklpa atan hau nia aman. Moras komesa iha 2000 nee to ohin loron seidauk diak

  3. Boa Tarde e parabens ba Comandante sira hotu mak Hau respeto no hakuak.,.

    Sugere deit karik atu loke fale rekrutamento foun se bele karik bele loke opportunidade ba joven sira nebe mak uluk dokumentos la kompleta nee atu bele kompete fila fali Tamba joven Barak mak hadia ona dokumentos para Hein fale rekrutamento foun atu sai nee…

    Hau Nia sugestão mak me deit obrigado…

Leave a Reply

iklan
error: Content is protected !!