Ministru Agrikultura no Peska (MAP), Pedro dos Reis. Imajen TATOLI/Francisco Sony

DILI, 16 fevereiru 2022 (TATOLI) – Ministru Agrikultura no Peska, Pedro dos Reis, orienta ona tékniku sira halo normalizasaun ba irrigasaun iha Atabae, hodi fornese bee ba natar nune’e agrikultór sira bele halo produsaun époka dahuluk.

Oras ne’e agrikultór Atabae seidauk hahú halai natar époka dahuluk tanba irrigasaun antigu ne’ebé  konstrui kedas iha tinan 40 liubá hetan estragu no la funsiona.

“Ohin, ha’u orienta tékniku sira destaka ona eskavatór ba hasai sedimentasaun, fahe bee, depois hasai bee atu sira bele halai natar époka dahuluk ninian, atu fasilita sira halo produsaun iha tinan ne’e,” Pedro dos Reis informa Agência Tatoli, iha Palásiu Governu, kuarta ne’e.

Ezekutiva ne’e haklaken, normalizasaun ne’e atu fasilita de’it agrikultór sira halo produsaun hare iha époka dahuluk, maibé ba oin governu sei kontinua esforsu tau iha planu prioridadde hodi halo konstrusaun foun nune’e fornseimentu bee ba natar bele la’o normál.

“Ha’u halo atendimentu ida-ne’e hanesan emerjénsia, tanba ema presiza bee ba natar la’ós irrigasaun bee tama lai atu ema bele halo natar, depois ha’u sei buka osan atu halo kontrusaun ba irrigasaun ne’e, tanba irrigasaun ne’e antigu liu ona, presiza duni halo konstrusaun foun,” nia dehan.

Irrigasaun ne’e rekursu bee mai husi mota Loes, ne’ebé durante ne’e fornese bee ba natar sira husi suku Rairobo no Aidabaleten, postu administrativu Atabae.

Tuir dadus Sensu Uma Kain 2015 postu administrativu Atabae iha suku haat mak hanesan, Aidabaleten, Hataz, Rairobo no Atabai ho totál populasaun hamutuk 10,933 kompostu hosi feto 5.931 no mane 5.572.

Jornalista             : Sérgio da Cruz

Editór                   : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here