Ministru Turizmu Komérsiu no Indústria, José Lucas Do Carmo da Silva. Imajen TATOLI/Francisco Sony

DILI, 16 fevereiru 2022 (TATOLI) – Governu liuhosi Ministru Turizmu, Komérsiu no Indústria, José Lucas, sei aprezenta dekretu-lei regula programa Cesta Bázika faze daruak iha tinan fiskál 2022 ba Prezidente Repúblika Francisco Guterres ‘Lú Olo’ atu hetan promulgasaun.

“Iha semana liubá, pakote lejizlativu dekretu lei ba implementasaun Cesta Bázika faze segundu nian liutiha ona hosi Konsellu Ministru, ne’ebé agora prosesa ona atu haruka ba Prezidente Repúblika atu promulga, ne’ebé ita hein ida-ne’e,” Ministru José Lucas, informa ba jornalista sira hafoin remata reuniaun Konsellu Ministru, iha Palasiu Governu.

Daudaun ne’e Ministériu Turizmu Komérsiu no Indústria mós prepara hela diploma ministeriál, kuandu Prezidente Repúblika promulga dekretu ne’e seo avansa ba implementasaun Cesta Bázika faze daruak nian.

“Nia implementasaun iha faze segundu ne’e la hanesan, nia mai sei haree liuba sira-ne’ebé presiza liu. Ne’e duni iha-ne’eba regula katak, sira-ne’ebé iha saláriu liu $500 sei la konsidera, tanba iha dekretu lei ne’e hatete klaru ona,” nia katak.

Programa Cesta Bázika faze daruak ne’e, sei presiza halo diskusaun entre liña ministeriál sira, envolve mós Ministériu Agrikultura no Peska, atu halo levantamentu dadus nune’e bele halo mapamentu ba produtu lokál sira iha territóriu nasionál.

Nune’e iha 09 fevereiru semana kotuk, Ministru Koordenadór Asuntu Ekonómiku (MKAE), Joaquim Amaral, aprezenta o na rezolusaun ida ba Konsellu Ministru (KM) aprova ho alterasaun, ba medida distribuisaun Cesta Bázika ba família Timor-oan sira-ne’ebé presiza liu no apoiu operadór ekonómiku lokál, kria rejime espesiál kona-ba aprovizionamentu, iha ámbitu planu rekuperasaun ekonómiku ho valór $50 ba membru ida-idak iha uma-kain ida sai benefisiáriu iha 2022.

Entretantu, iha 07 dezembru 2021 Parlamentu Nasionál aprova proposta Orsamentu Jerál Estadu (OJE) 2022 ho montante millaun $40 ba Sekretaria Estadu Kooperativa (SEKoop) hodi implementa programa Cesta Bázika.

No iha 10 dezembru 2021 Parlamentu Nasionál liuhosi diskusaun faze espesialidade ba proposta lei Orsamentu Jerál Estadu (OJE) 2022 aprova tán orsamentu adisionál ho montante millaun $40 ba Ministériu Turizmu Komérsiu no Indústria (MTKI) hodi implementa programa Cesta Bázika.

Nune’e programa Cesta Bázika ba faze ne’e sei implementa hosi Ministériu Turizmu, Komérsiu no Indústria (MTKI) no Sekretaria Estadu Kooperativa (SEKoop), ho kustu millaun $80.

Antes ne’e Governu implementa programa Cesta Bázika ne’ebé benefísia Timor-oan hotu hamutuk 1.491.661 kabaze, iha aldeia 2.234 hosi suku 452, no programa ne’e implementa durante fulan-14, ne’ebé envolve empreza nasionál hamutuk 218.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here