Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos, lidera reuniaun Konsellu Ministru, iha Palásiu Governu, kuarta (16/02). Imajen TATOLI/Francisco Sony

DILI, 16 fevereiru 2022 (TATOLI)–Governu liuhosi reuniaun Konsellu Ministru (KM) aprova ona Projetu Rezolusaun Governu, ne’ebé estabelese adezaun akordu-kuadru atu fasilita komérsiu transfronterisu la hó surat-tahan iha Ázia no Pasífiku.

Proposta ne’e aprezenta hosi Vise-Ministru Negósiu Estranjeiru no Kooperasaun (MNEK), Julião da Silva.

“Hein katak ida-ne’e bele fornese ba país Ázia no Pasífiku sira, ho ferramenta no komplementu dijitál foun ida, ba implementasaun akordu fasilita Organizasaun Mundiál Komérsiu (OMK) di’ak ida no ba dezenvolvimentu komérsiu eletróniku transfronterisu hosi dalan konjuntu komún ho prinsípiu jerál no plataforma itergovernamentál ne’ebé dedikadu,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu, kuarta ne’e.

Notísia relevante: MKAE lidera reuniaun komisaun interministeriál daruak prepara adere ba OMK

Portavós Governu dehan, akordu ne’e atu fasilita di’ak liután komérsiu entre Timor-Leste ho nasaun sira seluk.

Durante ne’e Timor-Leste hamutuk ho país 22 seluk sai observadór hodi akompaña prosesu no kumpre rekezitu hodi sai membru OMK hanesan ho nasaun 164 sira seluk.

Hanesan país observadór, Governu estabelese grupu traballu ba OMK hanesan komité traballu hodi halo preparasaun, negosiasaun, prienxe rekezitu no tuir enkontru koordenasaun ho Estadu membru.

Adezaun ba organizasaun mundiál ne’e ho hanoin ida katak Governu bele halo parseria ho setór privadu nasionál no internasionál atu loke kampu traballu ba timor-oan.

OMK hanesan organizasaun ne’ebé regula komérsiu entre país sira ho objetivu atu garante katak atividade komersiál hotu la’o ho forma fasil, livre, previzível no posível.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here