Admistradór postu administrativu na’in-lima iha munisípiu Baucau simu pose ba mandatu tinan-haat iha CCB, kuarta (16/02). Imajen espesiál.

BAUCAU, 16 fevereriu 2022 (TATOLI) – Administradór postu administrativu Baguia, Laga, Quelicai, Vemasse no Baucau Vila foun iha munisípiu Baucau kuarta ne’e, simu pose hosi Prezidente Autoridade Munisipál no akompaña hosi Vise-Ministru Administrasaun Estatál.

Administradór foun na’in-lima ne’e kompostu hosi Baucau Vila lidera hosi Isencinio António da Silva, Vemasse lidera hosi Pedro da Costa Freitas, Quelicai lidera hosi Mateus Soares Cabral, Laga lidera hosi Domingos José Pereira no Baguia lidera hosi António dos Ramos.

Administradór postu administrativu na’in-lima ne’e simu pose ba mandatu tinan-haat, hahú hosi 2022 to’o 2025.

Vise-Ministru Administrasaun Estatal, Lino de Jesus Torrezão husu ba administadór foun sira atu uza instrumentu jestaun hanesan planu asaun anuál, planu aprovizionamentu, planu formasaun anuál ba rekursu humanus.

Nune’e mós planu investimentu munisipál ba postu administrativu no orsamentu administrasaun postu administrativu atu implementa nune’e garante objetivu desentralizasaun administrativa tuir Planu Estratéjika Dezenvolvimentu 2011-2030.

Admistradór postu administrativu Baucau Vila sesante, Francisco Ximenes kaer liman ho Administradór Baucau Villa foun, Isencinio António da Silva iha CCB, kuarta (16/02). Imajen espesiál.

“Administrasaun postu administrativu mak servisu liman-ain administrasaun munisípal nian, misaun atu asegura espesífiku postu administrasaun ninian, garante serbisu administrativu besik liu ba iha populasaun no promove partisipasaun povu no sidadaun sira iha atividade administrativa,” Vise MAE hateten iha Sentru Konvensaun Baucau (CCB, sigla portugés), kuarta ne’e.

Nia fó hanoin katak, pontu importante haat ne’ebe persiza asegura mak garante dezenvolvimentu ba setór privadu iha área rurál, loke oportunidade ba partisipasaun demokrátika iha nível lokál, promove harii estadu ida forte no asegura harii prestasaun ida dignu, efisiénsia no efetetivu iha serbisu públika.

Prezidente Autoridade Munisipál (PAM) Baucau, Olívio ‘Bou-Lesa’ Freitas agradese ba governu liuhosi MAE tanba servisu hamutuk ho Komisaun Funsaun Públika (KFP) ba prosesu selesaun méritu bazea ba kompeténsia, koñesementu, abilidade, esperiénsia serbisu atubele responsabiliza ho kualidade ba kna’ar ne’e.

“Hamutuk ita bele responsabiliza ba libertasaun foun, ita boot sira-nia responsabilidade importante hodi hatudu ba povu,” nia fó hanoin.

Antes ne’e administrador postu administrativu haat mak hanesan Quelicai lidera hosi Sebastiao Gaio, Laga lidera hosi Sabino Freitas, Baucau vila lideradu Francisco Ximenes no Vemase komanda hosi Sebastiao Filomeno Correia.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here