Diretór Ezekutivu FONGTIL Interinu, Helio Dias da Silva.. Imajen Tatoli/Francisco Sony

DILI, 15 fevereiru 2022 (TATOLI)—Diretór Ezekutivu Interinu, Forum Organizasaun Naun Governamentál Timor-Leste (FONGTIL), Helio Dias da Silva, hateten Sosiedade Sivil liuhosi FONGTIL sei halo monitorizasaun ba eleisaun prezidensiál ne’ebé sei akontese iha 19 marsu tinan ne’e.

“Agora daudaun FONGTIL ami iha ona koordenasaun ho Komisaun Nasionál Eleitorál no CNE, no ami sei sai hanesan observadór ba eleisaun, tanba ita hotu hatene membru FONGTIL iha 250 ne’ebé mak namkari iha NGO Internasionál, Nasionál no Lokál. Tanba ne’e agora daudaun ami alista hela aminia pesoál sira, liu-liu sira-ne’ebé servisu iha NGO nune’e hetan akreditasaun hodi hetan kartaun observadór nian hodi monitoriza ba itania eleisaun ne’ebé sei akontese iha 19 marsu ne’e,” Helio Dias da Silva hateten ba jornalista sira iha nia knaarfatin, Caicoli, Dili, tersa ne’e.

FONGTIL sei hahú halo observasaun iha prosesu kampaña eleitorál to’o eleisaun hosi nível postu to’o munisípiu, bazea ba kalendáriu eleisaun no dekretu-lei konaba prosedúr no oráriu ba lala’ok eleisaun prezidensiál 2022.

Nia hateten, atividade sensibilizasaun ne’e FONGTIL hala’o ona ba nia membru sira, hanesan halo ona diálogu ho sira, atu nune’e bele partisipa másimu iha eleisaun prezidensiál.

“Ami halo, atu nune’e alerta ba membru sira karik membru sira-ne’ebé iha trajetu ba grupu sira iha nível báziku, atu nune’e fó desizaun ba komunidade sira atu hotuhotu tuir eleisaun. Tanba, eleisaun ne’e direitu sidadaun nian, atu nune’e ita bele hili itania Prezidente Repúblika,” nia afirma.

SEKOMS husu sosiedade sivíl halo observasaun ba eleisaun Prezidensiál 2022

Entretantu, iha diálogu entre SEKOMS no FONGTIL, Sekretáriu Estadu Komunikasaun Sosiál (SEKOMS, Merício Juvinal dos Reis “Akara”, husu ba Sosiedade Sivil atu kontinua ativu no halo advokasia ba komunidade sira no halo observasaun ligadu ho kampaña Eleisaun Prezidensiál ne’ebé sei akontese iha fulan-marsu tinan 2022 ne’e.

“Ha’u ohin dehan mós ba itania maluk sosiedade sivil sira tenke kontinua ativu halo advokásia, nune’e ha’u dehan mídia hanesan meiu komunikasaun ne’ebé sira bele utiliza hodi halo mídia advokasia mós. Tanba, iha festa demokrasia ida-ne’e ita hakarak edukasaun sivika ne’e sa’e makaas liután, edukasaun sivika iha kontestu ida-ne’e atu fó konsiénsia hodi fó infomasaun di’ak ba itania sidadaun atu sira bele partisipa ativu iha eleisaun, tanba ita atu hili itania líder nasionál, ita presiza iha partisipaun, entaun ho edukasaun sivika ne’e oinsá sidadaun idakidak hatene nia direitu no prosesu. Aleinde ne’e, ami husu ba entidade relevante, hanesan CNE, STAE, bele mós kolabora ho sosiedade sivil no mídia atu halo edukasaun sivika ba itania sidadaun,” nia dehan.

Entaun, ho diálogu hanesan ne’e SEKOMS enkoraja Sosiedade Sivil atu sira halo servisu la’ós iha díli de’it maibé oinsá atu to’o iha área rurál.

“Tanba ne’e, koperasaun Governu ho sira tenke iha, tanba sira dala ruma presiza fasilidade no apoia orsamentu ita tenke apoia sira atu sira tulun Estadu no Governu to’o área rurais. Tanba, itania sosiedade sivil sira asesu barak liubá iha área rurais,” Merício katak.

Entretantu, Diretór Ezekutivu Interinu, Forum Organizasaun Naun Governamentál Timor-Leste (FONGTIL), Helio Dias da Silva, afirma diálogu entre Sosiedade Sivil no Sekretáriu Estadu Komunikasaun Sosiál hodi ko’alia konabá oinsa relasiona ho situasuan polítika iha rai laran, ne’ebé ohin loron hotuhotu akompaña, nune’e haree ba informasaun barak ne’ebé espalla iha komunidade.

“Tanba, Sosiedade Sivil nu’udar parseiru ba Governu, nune’e bele transmite informasaun ida ne’ebé los no kredivel ba itania komunidade sira. Tanba, tuir esplikasaun hosi Sekretáriu Estadu Komunikasaun Sosiál katak, agora dadaun iha informasaun barak espalla iha komunidade, katak dala ruma informasaun ne’ebé loos nian sai fali ba lalos, entaun ida ne’e papél sosiedade sivil, liliu ONG sira hodi halo kna’ar ba ida ne’e,” nia hateten.

Jornalista  : Nelia Fernandes

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here