Kompañia Cloud LLC.USA halo vizita ba paviliaun Timor-Leste iha Expo Dubai 2020. Imajen/MTKI

DILI, 15 fevereiru 2022 (TATOLI)—Ekipa serbisu paviliaun hosi Timor-Leste ba Expo 2020 Dubai, foin lalais ne’e, simu vizita hosi kompañia Dati Cloud LLC.USA, hodi ko’alia kona-ba planu investimentu.

Vizita ne’e, nu’udar kontinuasaun sorumutu antes ne’e entre delegasaun Timor-Leste no grupu emprezáriu Dubai, iha edifísiu Orix World Business Centre iha Down Town, Dubai, iha loron 12 fevereiru 2022.

Notísia relevante: Delegasaun Timor-Leste halo sorumutu ho grupu emprezáriu iha Dubai

Tuir nota ne’ebé Agência TATOLI asesu, durante sorumutu, na’in ba kompañia Dati Cloud LLC.USA, Amrish Patel, hateten, iha ona planu investismentu ne’ebé kompañia prepara hodi implementa iha Timor-Leste, relasiona iha área selling point haat ne’ebé orefere hanesan turizmu, petróleu no minerál, agrikultura no peska, transporte no lojístiku.

Kompañia Cloud LLC.USA hasai foto hamutuk ho Delegasaun Timor-Leste iha Expo Dubai 2020 hafoin halo enkontru. Imajen/MTKI

Relasiona iha área selling point haat ne’e, kompañia halo investimentu iha área petroleu no minerál, teknolojia agrikultura inklui sistema bankária, no manufaktura.

Tuir Amrish Patel, planu hirak ne’ebé hato’o ona foka liu ba área agrikultura, ne’ebé kompañia sei harii Manufaktura ida, nune’e bele prodús hahán ne’ebé komunidade konsumu loron-loron no sei exporta mós ba rai-li’ur hanesan Komunidade País ho Lian Portugés (CPLP, sigla portugés).

Iha biban ne’e, Delegasaun Timor-Leste ba Expo 2020 Dubai, sente orgullu no kontente tebes ho intensaun di’ak kompañia no iha esperansa parseiru ne’e sei nafatin konsistente ho inisiativa hodi bele realiza serbisu hamutuk entre parte rua iha futuru.

Sorumutu ne’e partisipa hosi Enviadu espesiál Timor-Leste ba Expo Dubai 2020, Arif Sagran, akompaña hosi Diretór Paviliaun, Jelino Soares, representante hosi Ministériu Negósiu Estanjeiru no Kooperasaun (MNEK),  Lesino Branco, no Diretór TradeInvest, Decio Ribeiro Sarmento, hamutuk ho nia ekipa.

Antes ne’e, Autoridade Expo Dubai hili Timor-Leste hanesan país iha pozisaun 50 hosi país 192, hodi fa’an produtu iha pavilaun Expo ne’ebé maka Pos-Expo sira atu halo.

Expo Dubai 2020 realiza iha Dubai, Emiradus Árabe Unidu, hosi loron 01 outubru 2021 to’o 31 marsu 2022, ne’ebé hanesan espozisaun mundiál dahuluk iha Médiu Oriente no partisipa hosi nasaun 190-resin.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here