Diretora Saude Municipio Dili, Agostinha Segurado. Imajen Tatoli/ Egas Cristóvão.

DILI,15 fevereiru 2022 (TATOLI)— Diretora Servisu Saúde Munisípiu Dili, Agostinha Segurado, informa pasiente dengue na’in-20 mak halo ona tratamentu intensivu iha Tasi-Tolu no Vera Cruz prepara ona atu halo tratamentu ba pasiente pozitivu COVID-19.

“Ita halo preparasaun ba fatin iha Tasi-Tolu iha building A ho B, ita halo tratamentu ba kazu dengue ho ekipamentu medikamentu ho rekursu ne’ebé mak preparadu no iha loron 11 fevereiru pasiente sira halo ona tratamentu iha ne’ebá no to’o agora iha ona pasiente na’in-20 pasiente,” Diretora Servisu Saúde Munisípiu Dili Agostinha segurado hateten iha MSSI ohin.

Notísia relevante: Dengue hamate labarik na’in-30, aimoruk fumigasaun foin to’o iha portu Dili

Daudaun ne’e, ekipa profisionál saúde nafatin iha Vera-Cruz, ne’ebé fazeadamente la simu ona pasiente dengue, tanba atu reativa fali ba tratamentu pasiente COVID-19.

“Ita halo mamuk ona Vera-Cruz hahú ohin ba oin, ita sei fó tratamentu de’it ba kazu COVD-19 no iha Tasi-Tolu ita simu pasiente dengue liuliu ba labarik sira,” nia afirma.

Kona-bá atividade fumigasaun paradu iha loron 8 fevereiru, Diretora ne’e dehan tanba aimoruk kímiku rega susuk mak laiha, maibé atividade sira seluk la’o nafatin.

Nune’e, nia   espera Servisu Autónomo Medikamentu no Ekipamentu ba Saúde (SAMES, sigla portugés, iha aimoruk kímiku fumigasaun hodi bele distribui atu kontinua halo atividade rega susuk iha kapitál Dili.

“Durante ita rega aimoruk kímiku ne’e apoia hosi Cruz Vermella Timor-Leste (CVTL) ho ita-nia inspetór sanitaria sira nafatin lori aimoruk abate tau iha fatin risku sira hodi kombate dengue,” nia akresenta.

Tanba ne’e, Postu administrativu haat iha Dili laran seidauk kobre hotu halo fumigasaun, maske balun kobre dala ida ona no balun seidauk kompleta kobre daruak nian.

“Ita bele dehan uma rihun 190 mak  rega ona aimoruk kímiku espera katak aldeia sira ne’ebé mak tama dala ida ona no seidauk dala-rua karik labele hanoin dehan ami la bá,  maibé aimoruk mai ami sei ba fila fali rega aimoruk kímiku susuk nian,” nia akresenta.

Notísia relevante: COVID-19: kazu pozitivu 129 no ativu 1.557

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here