Mota sobu moru irrigasaun Bulutu ne'ebé lokaliza iha postu administrativu Laleia, munisípiu Manatuto. Imajen/Simião da Costa.

DILI, 15 fevereiru 2022 (TATOLI)—Deputadu Alexandrino da Cruz hateten, tuir relatóriu fiskalizasaun komisaun D ne’ebé trata asuntu Ekonomia no Dezenvolvimentu katak, Governu liuhosi presiza normaliza ba irrigasaun lubuk iha munisípiu Manatuto ne’ebé hetan estragu iha 04 abríl 2021 liu-ba.

“Rekomenda ba Minist’eriu Agrikultura no Peska (MAP) no Institutu Jestaun Ekipamentu, Institutu Públiku (IGE, I.P, sigla portugés) atu iha koordenasaun servisu hodi buka rezolve liuhosi halo normalizasaun uluk hodi salva hikas fali irrigasaun no natar fatin sira-ne’ebé hetan estragu iha munisípiu Manatuto hanesan irrigasaun Cairui, Watuketan, Bauna, Wetiti, Kudhoku, Aidak-Laran, Gobaoli, Manlor, Manilai, Oetubo, Raspor no irrigasaun iha postu administrativu Laclo, hahú kedas hosi parte Kondar, Rembor ba to’o iha Bahadiki suku Leikore no ba futuru husu atu propoin iha planu orsamentu hodi halo estudu no mós konstrusaun,” Deputadu no Relatór, Alexadrino da Cruz, halo leitura ba relatóriu komisaun nian iha plenária, Parlamentu Nasionál, tersa ne’e.

Tuir relatóriu komisaun nian ne’ebé Agéncia Tatoli asesu ba fiskalizasaun postu Administrativu Laleia, Manatuto Vila no Laclo haktuir katak iha vizita ba Cairui-Laleia konforme informasaun ne’ebe relata husi reprezentante agrikultór intek (kanu hasan) ida-ne’e konstrui iha tinan 2015 hosi kompañia Aeheu Unip, Lda no iha momentu ne’ebá seidauk entrega mota mai sobu tiha parte odamatan intek, tamba teknikamente konstrusaun la tuir dezeñu ne’ebé aprova no konsege hadia fali.

Maibé problema ne’e mak kanál primariu ne’ebé liga ho intek ne’e nia konstrusaun klo’ot liu entaun defisíl tebes atu halo normalizasaun ba sedimentasaun no bainhira mota boot fasil liu mota sobu estraga, hanesan iha 04 abril 2021 ne’e mak hetan estragu boot liu, hahú kedas hosi intek ba to’o kanal irrigasaun mota sobu hotu no agora labele halo natar.

Hosi kanal irigasaun ida ne’e fomese bee ba natar hamutuk ektare170 no mota sobu tiha balun hela de’it ektare 90-resin mak komunidade sei utiliza hela, maibé problema mak intek mota sobu estraga tiha entaun bee labele halai ba natar.

Ho situasaun hanesan ne’e agrikultór sira husu atu hadi’a ka konstrui foun fali intek hodi nune’e bele fornese fali bee ba natar sira ne’ebé sei iha.

Vizita irrigasaun tradisonál no mós natar fatin sira iha aldeia Oenunu no Biabai suku Cairui hafoin tuir mai delegasaun Komisaun D ne’ebe akompaña hosi autoridade suku Caimi kontinua ba vizita irrigasaun tradisionál sira no mós natar fatin sira ne’ebé potensial maibé abandona durante tinan barak, tanba laiha irrigasaun no durante ne’e agrikutór sira konsege halo natar balun maibé halo ho sistema irrigasaun tradisionál.

lrrigasaun sira ne‘e mak hanesan irrigasaun Watuketan, irrigasaun Bauna, irrigasaun Wetiti, irrigasaun Kudhoku Aidak-Iaran, Gobaoli, Manlor, Manilai, Oetubo no irrigasaun Raspor, no  irrigasaun hirak ne’e iha 04 abríl 2021 mota sobu estraga hotu inklui natar fatin balun sai ona hanesan mota dalan no bee ne’ebé sustenta ba natar hirak ne’e hosi mai hosi mota Oeladada Lacluta no mota Oemori.

Aleinde delegasaun komisaun akompaña hosi Diretór Obra Públika munisípiu Manatuto hodi observa irrigasaun hotu iha postu administrativu Laclo ne’ebé kalamidade akontese iha 04 abril 2021, natar barak mak mota sobu no natar nia fatin sira nakonu ho fatuk no rai-henek hahú kedas hosi parte Kondar, Rembor ba to’o iha Bahadiki-Leikore.

Iha irrigasaun no natar fatin iha Dirimanu, suku Aitaes, Manatuto Vila, hosi akontesimentu kalamidade 04 abríl 2021 afeta natar sira hosi parte Dirimanu kuaze estraga hotu no natar nia fatin sira nakonu de’it ho fatuk no rai-henek halo normalizasaun ba bee mota dalan.

Tuir ofisiál irrigasaun munisípiu Manatuto katak iha mós irrigasaun no natar estraga hanesan iha irrigasaun Beuak, Iliato, Sau, Dilor 1 to’o Dilor 3, Ailili, Ma’abat, inklui populasaun balun nia plantasaun aihoris.

Tuir dadus ne’ebé relata hosi diresaun agrikultura munisípiu Manatuto katak área ne’ebé mak afetadu hosi inundasaun 04 abríl 2021 ho totál 957.12, hosi postu administrative Laclo 386, Manatuto Vila, 432.12, Sananain iha 89 no Cairui iha 50.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here