MAP realiza workshop validasaun dokumentu Estratejia Jestaun Risku Dezastre ba Setór Agrikultura, ha auditorium Ministériu Finansa, Aitarak-laran. Imajen/MAP

DILI, 15 fevereiru 2022 (TATOLI)—Governu liuhosi Ministériu Agrikultura no Peska (MAP), segunda ne’e, realiza workshop validasaun dokumentu Estratejia Jestaun Risku Dezastre ba Setór Agrikultura.

Ministru Agrikultura no Peska, Pedro dos Reis, hateten, dokumentu importante ne’e hanesan pontu entrada investimentu Redusaun Risku Dezastre iha setór agrikultura.

“Tanba eventu dezastre no impaktu dezastre ba agrikultura iha kada tinan aumenta. Ezemplu Timor-Leste enfrenta ona impaktu negativu hosi bailoron naruk ka El-Nino iha tinan 2015 to’o 2016, ne’ebé afeta 78% hosi totál uma-kain iha Timor-Leste,” Ministru relata liuhosi nota ne’ebé Agência TATOLI, tersa ne’e.

Notísia relevante: SEPS kumpre padraun ONU nian iha jestaun risku dezastre naturaís

Nota mós katak, agrikultór timor-oan barak mak hetan impaktu, balun lakon produsaun no animál hakiak, produsaun batar tun 40% no hare tun 57%, hosi totál uma-kain iha animál 48% mak mate no uma-kain 29.050 iha animál moras.

Nune’e, Sekretáriu Estadu Protesaun Sivíl (SEPS), Joaquim Gusmão dos Reis Martins, apresia inisiativa MAP hodi dezenvolve estratejia jestaun risku dezastre ba setór agrikultura, ne’ebé bele sai nu’udar referénsia ba ministériu no ajénsia relevante sira seluk atu prepara estratejia espesífiku kona-ba Jestaun Risku Dezastre iha kada setór.

“Inisiativa ne’e importante tebes ba MAP atu identifika lakuna sira iha jestaun informasaun, koñesimentu no mobiliza fundu intervensaun jestaun risku dezastre iha agrikultura nian,” Sekretáriu Estadu akresenta.

MAP nu’udar ministériu ne’ebé responsável ba koordenasaun no implementasaun Jestaun Risku Dezastre, sei fó apoiu hotu ne’ebé presiza liuhosi koordenasaun no implementasaun polítika, planu no estratejia.

“Ha’u fiar katak hafoin lansamentu estratejia ne’e, MAP sei dezenvolve planu operasionál sira ba prevensaun no mitigasaun dezastre, inklui resposta emerjénsia ba dezastre no planu rekuperasaun setór agrikultura,” nia dehan.

Iha fatin hanesan, Ministériu Administrasaun Estatál, Miguel Pereira, konsidera MAE hasoru dezafiu durante implementasaun atividade Jestaun Risku Dezastre, maibé liuhosi órgaun jestaun direta no indireta sira, ministériu ne’e bele implementa ho susesu programa resposta ba dezastre sira iha nível nasionál to’o lokál, lori serbisu públiku hakbesik liután ba família sira, liuhosi mekanizmu sira ne’ebé eziste, kona-ba programa desentralizasaun administrativa no besik liután ba futuru desentralizasaun administrativa.

Nune’e mós, Xefe Kooperasaun Uniaun Europeia, Ramon Reigada, rekoñese, ho impaktu sira ne’ebé iha, oportunidade agora mak atu asegura planu redusaun risku dezastre no adaptasaun mudansa klimátiku atu evita duplikasaun esforsu no atu masimiza uzu rekursu atu redús númeru impaktu ekonómiku no vida.

Lansamentu Estratejia Jestaun Risku Dezastre ba Setór Agrikultura ne’e rasik, dezenvolve hosi Jestaun Risku Dezastre Taskforce MAP, ho apoiu tékniku hosi ekipa projetu reziliénsia hosi Food and Agriculture Organization (FAO) no suporta finanseiru hosi Uniaun Europeia, ho totál fundu ba programa millaun €3 ka millaun $3,3.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here