Tékniku EDTL halo instalasaun eletrisidade iha área Bebora, Dili. Imajen TATOLI/António Gonçalves

COVALIMA, 14 Fevreiru 2022 (TATOLI)–Xefe suku Zulo, postu administrativu Zumalai, munisípiu Covalima, João Lopes de Carvalho preokupa, iha fulan ida-nia laran ona eletrisidade, iha postu administrativu Zumalai lakan-mate hodi estraga komunidade nia sasán eletrónika sira.

“Ami asesu ona eletrisidade maibé iha fulan ida nia laran, eletrisidade iha postu administrativu Zumalai sempre lakan-mate, to’o ohin loron mak foin lakan,” Xefe suku ne’e informa ba Agência Tatoli liuhosi telefonika, segunda ne’e.

Nia lahatene razaun tanba saida mak eletrisidade lakan-mate maibé husu ba Eletrsidade Timor Leste (EDTL, E.P) atu responsabiliza. 

Tuir nia. eletrisidade mak loro-loron mate-lakan hanesan ne’e hela de’it fó impaktu tebes ba komunidade liu-liu estraga komunidade nia sasán eletrónika sira hanesan zelera, televizaun no sasán eletróniku sira sleuk tan.

Asuntu ne’e bainhira Agência Tatoli halo konfirmasaun ho supervizór EDTL, E.P Munisípiu Covalima maibé sira labele fó informasaun tanba prezidente EDTL, E.P la autoriza Supervizór sira fó sai informasaun maibé EDTL, E,P mós haruka ona relatóriu ba iha nasionál.

Administradór munisípiu Covalima, Francisco de Andrade hateten, nia parte seidauk simu informasaun kona-ba ahi mate-lakan iha postu administrativu Zumalai, hosi administradór postu.

“Ha’u seidauk simu informasaun kona-ba ahi mate-lakan iha postu administrativu Zumalai, munisípiu Covalima. Ha’u simu informasaun hosi postu administrativu Fatumea ahi lakan mate no ha’u tun kedas ba terrenu tanba anin boot, nune’e EDTL, E.P sei hamate provizóriu,” nia informa.

Postu Administrativu Zumalai kompostu hosi suku Fatuleto, Lepo, Lour, Mape Raimea, Tashilin, Usecai no Zulo.

Jornalista : Celestina Teles

Editór       :  Cancio  Ximenes 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here