Diretór STAE Baucau, Lúcio Freitas Salvador. Imajen Tatoli/Natalino Belo.

BAUCAU, 14 fevereiru 2022 (TATOLI) – Sekretariadu Tékniku Administrasaun Eleitorál (STAE) estabelese sentru votasaun hamutuk 125 no estasaun votu 150 iha munisípiu Baucau ho totál eleitór 96.875.

“Ita iha sentru votasaun 125, estasaun votu 150 ne’ebé eziste hodi hatán ba eleisaun prezidensiál ne’ebé atu mai,” Diretór STAE munisípiu Baucau, Lúcio Freitas Salvador informa ba Agéncia Tatoli iha  Vila Nova, segunda ne’e.

Brigadista sira hahú ona serbisu iha janeiru liubá hodi identifika sentru no estasaun votu hanesan kondisaun fatin, bainhira iha eskola sei koordena ho koordenadór eskola sira.

Nune’e mós bainhira to’o tempu eleisaun realiza sei rekruta tan ofisial sentru votasaun sira ne’ebé kadda estasaun votus presija ema nain-10 nune’e sei rekruta tan ofisial hamutuk rihun 1.500.

“Ita sei rekruta ofisiál sira iha tempu badak tanba ofisiál sira sei serbisu de’it loron tolu, antes votasaun, votasaun no hafoin votasaun,” nia katak.

Lúcio akresenta, kada suku sei estabelese sentru votasaun ida to’o neen hanesan iha suku Gariuai, postu administrativu  Baucau Vila iha sentru votasaun neen tanba bazea ba númeru eleitór.

Númeru sentru votasun iha munisípiu Baucau barak iha postu administrativu Baucau Vila totál hamutuk 32, Baguia 22, Quelicai 28, Venilale 16, Laga 16 no kiikliu 11 sentru votasaun.

“Iha 32 pontu mak ita tau atensaun tanba kondisaun estrada ladi’ak, kuaze iha postu administrativu neen iha hotu hanesan iha Venilale tolu, Vemasse tolu, Baguia lima, Baucau Vila rua no restante iha Laga no Quelicai,” Lúcio hateten.

STAE no Polísia Nasionál Timor-Leste (PNTL) komandu munisípiu Baucau daudaun ne’e kontinua koordena ba malu atu estabelese pesoál seguransa iha kada sentru votasaun mínimu na’in-rua atu nune’e bele koordena malu bainhira mosu tentativa durante eleisaun prezidensiál.

STAE Baucau iha funsionáriu permanente hamutuk na’in-lima, kontratadu ne’ebé apoia iha eskritóriu hamutuk na’in-tolu, postu administrativu sira iha operadór sistema na’in-ida, asistente na’in-ida no pontu vokal na’in-ida totál hamutuk na’in-18 no brigadista hirak-ne’ebé foin lalais rekruta hamutuk na’in-125 tuir númeru sentru votasaun.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here