Diretór Estabelesimentu Prizionál Becora, João Domingos. Imajen Tatoli/Nito dos Santos.

DILI, 14 fevereiru 2022 (TATOLI)–Diretór Estabelesimentu Prizionál Becora, João Domingos, informa prizioneiru 481 iha Prizaun Becora prontu partisipa eleisaun prezidensiál 2022 ne’ebé realiza iha 19 marsu hodi ezerse sira-nia direitu votu atu hili Prezidente Repúblika períodu 2022-2027.

Notísia Relevante: ONG SHC fó formasaun HIV/SIDA ba dadur 25 iha prizaun Becora

“Maibé tuir eleisaun ne’e ba tuir de’it ita iha prova kritériu katak tenke kartaun identidade ida. Entaun ita hatene katak kartaun lubuk ida-nian mak laiha tanba lakon entaun presiza halo deklarasaun mak sei ba liuhosi xefe suku, Polísia Nasionál Timor-Leste (PNTL) depois to’o iha Tribunál, oinsá hetan legalidade hodi prodús kartaun ba dadur sira. Ami hetan sujeita hosi Sekretariadu Téknika Administrasaun Eleitórál (STAE) hodi halo dadur sira-nia ona kartaun eleitorál iha loron 07-08 fevereiru,” Diretór Prizaun Becora ne’e hateten ba Agência Tatoli iha nia knaar fatin Prizaun Becora, Dili, segunda ne’e.

Nia dehan prizioneiru ne’ebé mak halo kartaun eleitorál foun no atualiza hamutuk 263, no atuál iha dadus prizioneiru hamutuk 481 ne’e kompostu hosi prizaun kondenadu 390 no sira-ne’ebé mak hein desizaun ka prizaun preventiva hamutuk 91.

Hosi dadur na’in-481 ne’e, nia hateten, ema hosi estrajeiru 11, iha eis Polísia Nasionál Timor-Leste (PNTL) na’in-tolu (3), eis FALINTIL-Forsa Defeza Timor-Leste (F-FDTL) iha na’in-rua (2), no iha mós dadur labarik sira ho tinan 21 mai kraik hamutuk 28.

Iha tinan 2022, nia dehan, Prizaun Becora ne’e overcapacity ho prizioneiru 481 maibé agora di’ak ona tanba la hanesan ho tinan uluk tanba tinan uluk ne’e hamutuk 600 tuun mai 500-resin no dala ruma mantein.

“Agora ba tinan ne’e númeru tuun kompara ho tinan kotuk entaun signifika ami bele jere no oinsá bele halo jestaun ba espasu nian,” nia dehan.

Entretantu, nia informa, iha prizioneiru na’in-18 mak moras mentál ne’ebé mak sira-nia parte halo tratamentu iha Hospitál Nasionál Guido Valadares (HNGV-sigla portugés) no daudaun ne’e sira komesa pasivu ona maibé uluk ne’e atiu tebes.

“Kona-ba tratamentu ita nafatin halo no sira-ne’ebé mak moras mentál ami servisu hamutuk ho doutór ka psikater atu halo kurativu sira-nia moras mental, maibé agora sira pasivu ona no la ativu ona. Iha mós moras Tuberkoloza (TB) na’in-rua (2) maibé besik di’ak ona,” nia dehan.

Notísia Relevante: Prizioneiru 539 iha prizaun Becora simu vasina doze dahuluk

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here