Komandu PNTL RAEOA hahù koloka membru na'in-neen asegura materiál iha edifisiu STAE. Iha imajen ne’e hatudu membru polísia na’in-rua tuur hela iha eskritóriu STAE nian. Imajen Tatoli/Abílio Elo Nini.

OÉ-CUSSE, 14 fevereiru 2022 (TATOLI)— Komandu Polísia Nasionál Timor-Leste (PNTL), Rejiaun Administrativa Espesiál Oé-Cusse Ambeno (RAEOA) lideradu Superintendente Xefe, Mateus Mendes Assunção, segunda ne’e hahú koloka membru efetivu na’in-neen asegura edifísiu Sekretariadu Tékniku Administrasaun Eleitorál (STAE) Oé-Cusse nian.

“Ha’u simu orientasaun hosi komandu nasionál, atu fó membru efetivu balun asegura materiál sira iha STAE, hodi hein mós materiál sensitivu no la’ós sensitivu sei dezloka mai iha STAE, ne’ebé komandu deside iha segunda ne’e koloka membru na’in-neen,” Mateus Mendes Assunção, informa ba Agência Tatoli iha kuartel PNTL, Oé-Cusse.

Nia fó-sai katak, kolokasaun ne’e ba STAE ne’e atu asegura sasán sira-ne’ebé maka Estadu depozita iha edifísiu STAE Oé-Cusse nian.

Diretora STAE RAEOA, Luíza da Costa, agradese ba prezensa PNTL tanba hahú ona asegura ekipamentu ne’ebé sei uza iha eleisaun prezidensiál.

“Kolokasaun PNTL mai iha STAE ne’e importante atu asegura sasán no materiál sira iha edifísiu, hodi hein materiál sensitivu no la’ós sensitivu, ne’ebé sei dezloka mai hosi nasionál iha tempu badak, entaun seguransa presiza nia prezensa antes, tanba materiál sira-ne’e sei mai ho transporte marítima nian,” nia katak.

Entretantu, kampaña eleisaun prezidensiál períodu 2022-2027 sei hahú hosi loron 2 marsu no termina iha loron 15 marsu, no loron eleisaun sei realiza iha loron 19 marsu.

Jornalista         : Abílio Elo Nini
Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here