Segundu Komandante PNTL munisípiu Bobonaro, Asistente Superintendente Fásio de Jesus Lima. Imajen Tatoli/Sérgio da Cruz.

BOBONARO, 14 fevereiru 2022 (TATOLI) – Polísia Nasionál Timor-Leste (PNTL) liuhosi Unidade Patrullamentu Fronteira (UPF) no Komandu Operasaun Espesiál (COE, sigla portugés) segunda ne’e detetin sidadaun mane ida tanba hatama gazolina ilegál hosi Atambua, Repúblika Indonézia nian mai territóriu Timor-Leste.

Segundu Komandante PNTL munisípiu Bobonaro, Asistente Superintendente Fásio de Jesus Lima, informa sidadaun mane inisial(DDJ ne’e ho idade 21 estatutu klosan orijen husi suku Tapo-Memo, postu administrativu Maliana, munisípiu Bobonaro.

“Ohin dadersan tuku 01:50 madrugada ita-nia membru UPF na’in-rua hamutuk ho COE sira halo patrullamentu iha liña fronteira area Tapo-Memo konsege kaptura sidadaun ida halo tranzasaun ilegál gazolina litru 140 ne’ebé tula ho motorizada tau iha jerigen haat,” nia informa ba jornalista sira iha kna’ar-fatin, Maliana.

Daudaun ne’e komandu UPF entrega ona sidadaun  ne’e inklui mós evidénsia ba iha parte seksaun invetigasaun krimanál PNTL munisípiu Bobonaro, hodi halo prosesu identifikasaun  nun’e bele aprezenta ba Ministériu Públiku (MP).

“Ita orienta nafatin Ofisiál Polísia Suku mantein serbisu ho autoridade lokál sira nomoos ita-nia forsa sira-ne’ebé destaka iha liña fronteira atu nune’e bele hamutuk kombate atvidade ilegál,” nia afirma.

Jornalista         : Sérgio da Cruz

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here