Imajen/Media PR.

DILI, 14 fevereiru 2022 (TATOLI)—Parlamentu Nasionál (PN), segunda ne’e liuhosi reuniaun plenária aprova proposta-lei estabelese rejime jurídiku ba asosiasaun profisionál sira iha faze espesialidade finál globál.

Proposta lei númeru 25/V/3a-Rejime Jurídiku Assosiasaun Públika Profissional ne’e aprova ho votu a-favór 40, kontra no abstensaun laiha.

“Nune’e proposta lei ne’e aprovadu,” Prezidente Parlamentu Nasionál, Deputadu Aniceto Longuinhos Guterres Lopes, deklara liuhosi plenária, Parlamentu Nasionál.

Komisaun A trata asuntu Justisa no Konstituisional sei halo redasaun finál ba proposta lei ne’e hafoin envia ba Prezidente Repúblika hodi halo promulgasaun ka veta tuir kompeténsia Xefe Estadu nian.

Proposta-lei numeru 25 /V/(3a), ne’ebé estabelese rejime jurídiku ida ba Asosiasaun Públika Profisionál ne’ebé aprezenta hosi Governu liuhosi Ministériu Justisa. Substánsia hosi proposta-lei atu hamosu rejime jurídiku ida ba asosiasaun públika profisionál sira.

Proposta-lei ne’e kompostu hosi artigu hamutuk 33 no kapítulu neen (6). Kapítulu I kona-ba dispozisaun jerál ho artigu 12, kapítulu II kona-ba organizasaun no funsionaentu internu ho artigu hamutuk lima (5), kapítulu III kona-ba ezersísiu no asesu ba profisaun artigu neen (6).

Nune’e mós kapítulu IV kona-ba rejime laborál, finanseiru no fiskál ho artigu hamutuk tolu (3), kapítulu V kona-ba tutela, kontrolu no responsabilidade ho artigu hamutuk lima (5) no kapítulu VI kona-ba norma tranzitória no finál ho artigu hamutuk rua (2).

Prezidente Komisaun A, Deputadu Joaquim dos Santos, esplika proposta-lei ne’e atu hamosu rejime ida hodi regula asosiasaun públika sira no atu hamoris profisionál públika sira-nian iha Timor-Leste.

Jornalista : Nelson de Sousa

Editór        : Cancio Ximens

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here