Diretòr kompañia lokál sira partisipa sensibilizasaun dekretu-lei kona-ba sertifikasaun no inskrisaun ba empreza konstrusaun Sivil. Imajen Tatoli/Celestina Teles.

COVALIMA, 14 Fevreiru 2022 (TATOLI)–Ministériu Obra Públika liuhosi Dirasaun Nasionál Administrasaun Finansa, Januario Patricio Barbosa, sensibiliza   dekretu-lei númeru 27/2010, 22 Dezembru, primeira alterasaun dekretu-lei númeru 17/2021, ko’alia, kona-ba sertifikasaun no inskrisaun ba empreza konstrusaun sivil no empreza konsultóriu tékniku sivil ba emprezáriu lokál iha Covalima

“Sertifikasaun la’o iha tinan 2010, iha ita-nia rai-laran problema barak hanesan iha tinan 2015 sertifikasaun la’o. Entaun foin lalais tinan kotuk ita iha dekretu-lei numeru 17/2021 fortifika oinsá ita estabelese sertifikasuan ba ita-nia emprezáriu timor-oan no hakbiit sira-nia atividade kompete mós emprezáriu mai hosi rai-li’ur,” Januario Patricio Barbosa informa ba Agência Tatoli iha salaun Administrsaun Covalima, Kampung Baru, segunda ne’e

Dekretu-lei ne’e, ko’alia kona-ba klasifikasaun ba kompañia atu identifika klase A-C no B2 bele hatene kapasidade no empreza sai parseiru dezenvolvimentu ba Governu  hodi ezekuta projetu tuir badget ne’ebé iha.

“Kritéria atu identifika klase ne’e, ami-nia rekezitu barak mak hanesan sei foti formuláriu ita sei halo avaliasaun rekezitu sira-ne’e hafoin ita foti ida-ne’e mak sai klase A hanesan kapasidade finanseira no enjineiru iha ka lae nia office iha ka la’e hafoin justifika,” nia hateten.

Durante ne’e, emprezariu timor-oan sempre hasoru difikuldade hanesan iha tinan hirak liuba projetu sira-ne’e ajudikasaun direta la haree ba valór no bainhira tuir tenderizasaun difikulta sira atu prenxe rekezitu.

“Ita-nia timor-oan iha tinan hirak liu projetu sira-ne’e ita fó ajudikasaun de’it la haree ba valór ne’ebé iha, bainhira sira mai kompete iha tenderizasaun difikulta sira atu prenxe rekezitu. Entaun, ita mai fó kapasitasaun ba sira fahe informasaun no disemina dekretu-lei sira-ne’ebé guia sira atu kompete iha future,” diretór ne’e informa.

Administrador Munisípiu Covalima, Francisco de Andrade, hato’o agradesimentu ba Ministériu Obra Públika (MOP) ne’ebé realiza sensibilizasaun ba kompañia sira, nune’e kompañia bele sira entende prosesu ho didi’ak.

Kompañaa iha Covalima dala ruma sira haree buat kiik-oan ruma la kompleta ohin hanesan esplika sira garante de’it rekursu finanseiru ka dokumentu la kompletu.

“Ha’u hanoin liuhosi sensibilizasaun diretór kompañia sira halo diskusaun ativu, nune’e bele hatene lala’ok sira agora daudaun akontese, tanba projetu barak abandona husu MOP atu identifika atu hamatan lista sira-ne’e. Ita duni liu osan, hanesan osan ita halo pagamentu 20% la foku ba projetu maibé ba fali fatin seluk,” nia esplika.

Administradór mós husu diretór kompañia sira atu aproveita oportunidade ne’e, tanba emprezáriu lokál sira la’ós foin mak atu aprende hodi kaer projetu, ba futuru tenke prepara rekursu atu bele kompete iha nasionál.

Jornalista : Celestina Teles

Editór       :  Cancio  Ximenes 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here